سلام عليكم دكتور
ابني عمره شهر واسبوع ( ٣٧ يوم ) يرضع صناعي فقط مشكلته بعد الرضعة يبدي يبجي بكاء متقطع يسكت ويبجي رغم شبعان ويصير احمر كلش ويعصر بروحه يبقى على هالحالة ربع ساعة احيانا اقل ومرات اكثر لمن يهدأ شنو تفسير هالحالة صارلها فترة بادية عنده مغص لو غازات ممكن يبدي المغص بهيج عمر ؟ وشنو علاج هالشي ؟ لان احسه دا يتأذة رغم انطيه حليب سميلاك كومفورت ضد المغص والغازات
ممكن بلا زحمة تشرحلي عن المغص وشون اتعامل وياه وشنو علاجه
تشخيص المغص هو تشخيص عن طريق استبعاد جميع الاسباب الاخرى والموضوع يطول بهالخصوص .. نفحص الطفل فحص شامل نتأكد سلامته من الفطريات الفموية والطفح الجلدي الي بمنطقة الحفاظ ونتأكد انه ماعنده التهاب سحايا او التهاب بمكان ما يسببله هالالم وبعد ما نستثني جميع الاسباب بوقتها نكدر نكول هذا مغص ونرشدكم للتعامل معاه
التعامل مع المغص يكون بالشكل التالي :-
المغص
مغص الطفل
او الغازات
مغص ٣ اشهر
متلازمه الطفل الازرق او البنفسجي
سموها اللي يعجبكم
تعريفه العلمي هو بكاء الطفل بدون اي سبب مرضي لاكثر من ٣ ساعات بعدد ايام اكثر من ٣ ايام بالاسبوع لفتره اكثر من ٣ اسابيع
المغص يبدي مبكرا من الاسبوع الثالث او الرابع
و هنا الوم شويه على بعض الامهات اللي تحضر قطرات المغص اول ما يجي الطفل
هنا نادرا ما يكون السبب هو المغص
ثاني شي الاطفال الغير مكتملي النمو بعدين يصير عدهم المغص بعد ما يكتملون و يكملون الشهر التاسع يعني ينحسب الاسبوع الثالث من الموعد اللي المفروض ينولدون بيه
لهذا يكونون هادئيين بالبدايه بس بعدين يبين عندهم المغص
يسموه مغص ٣ اشهر
لان بالعاده يختفي بعمر ٣ اشهر
ولو احيانا يستمر الى ٦ اشهر
اتفاجيء من امهات مستمرات عل قطرات المغص الى عمر فوك ال ٤ اشهر !!
بكاء الطفل الغير مرضي فوق ال ٤ اشهر هو التسنين
اما الاسباب المرضيه فكثيره و هي مو موضوعنا
نكمل البوست
الاسباب ؟
غير معروفه
بس الثابت انه كلما توترت الام بفتره الحمل كلما احتماليه المغص تزيد
احيانا يكولون عدم نضوج الامعاء
و قسم يكولون هو الحليب اصلا معروف يسوي غازات
كثره الاغطيه تزيد المغص
و اهمال اطفاء الاضويه كذلك
المهم اسبابه هوايه بس اهمها و اوضحها هو توتر الام فكلما كانت متوتره كلما الطفل متوتر
.
.
الاعراض هي واضحه
بكاء بدون سابق انذار
و الطفل يصير احمر او ازرق من المغص
البكاء يبدي المغرب الى نهايه الليل
و ما يسكت لا برضاعه و لا ملهيه و لا اي شي
الطفل بطنه منفوخه و كبيره
بس الطفل نموه زين
و اموره ماشيه
و ما عنده اي مشكله عضويه
المشكله بالام اللي ممكن تفوت بمرحله الكابه اكثر من غيرها من الامهات
.
.
العلاج
الصبر
الصبر
الصبر
الصبر
الصبر
الصبر
و الكثير من الصبر
اذا ترضعين طبيعي انتبهي لاكلك
القهوه تسوي سهر
البقوليات يسوي مغص
الخيار و البرتقال و الطماطه ممكن يسوي مغص
الحليب و مشتقاته جدا تسوي مغص
اذا يرضع رضاعه صناعيه ممكن تغيير الحليب
و استخدمي الملهيه جدا تقلل المغص
بس لا ننسى الملهيه تنترك بعمر ٦ اشهر حتى لا تاثر على الاسنان
اهم شي التربيت على الظهر بنص الرضعه و بنهايتها
و لا ننسى الجو المعتدل اساس الحل لاغلب مشاكل الرضع
من يبدي يبجي احمليه بالمسكه السحريه اللي هي ينام مستلقي على ذراعك
انطيه لوالده يحمله
ضيفي برد لجو الغرفه
قللي الاغطية
الكماط يساعد على الراحه بس لا ننسى الكماط ما يشمل الساقين ابدا
احضني طفلك اكثر
اهمسي باذنه اشششش اششش
التدليك جيد جدا و خصوصا بالزيت
الحمام خيار جيد للطفل قبل النوم
اذا ما فاد طلعه صغيره بالسياره ممكن تكون مفيده جدا و نلجئلها في بعض الاحيان
و اخيرا و لا ننسى الضوضاء البيضاء مثل صوت المروحه او المكنسه الكهربائيه او السشوار
قطرات السيمثكون ممكن تفيد و هي كثيره مثل البيي كون و الكولك ايز و الدسفلاتيل و الانتي كاز و المتيسيل و الديفلات و غيرها ما اتذكر اسماؤها
و بس
د. سيف سمير البياتي
اخصائي طب الاطفال