النرگيله الصغيرة vape

بالنسبة للفيب او الي تسموها نركيلة الكترونية
هاي توصيات فريق ال Up-to-date من أعلى المصادر العلمية الي نتبعها ك اطباء
– بالنسبة للنيكوتين، المضار نفس مضار الجكاير وكلما زاد تركيز النيكوتين كلما زادت المخاطر وهي زيادة دقات القلب و امراض القلب والادمان ، يعني الفيب ممنوعة عالاطفال او الشباب الي يريدون يبدون يدخنوها لانها راح تسويلهم إدمان وبالنتيجة اذا ما يبقى عنده فلوس يتحول عالجكاير والنركيلة
– بالنسبة للسرطان لحد هسة ماكو دراسة تثبت أثرها او تنفيه لكن يعتقدون انها اقل خطرا من الجكاير العادية بكثير
– اكو مرض خاص جديد سموه EVALI وهو مختصر لاسم انكليزي ترجمته معناها الإصابات الرئوية الحادة الناتجة من تدخين الفيب تقريباً تشخصت حوالي ٢٠٠٠ حالة بهذا المرض وشافوه مرتبط ب استنشاق مواد معينة من الفيب خصوصا اذا المحتويات مصادرها غير اصلية ( يمكن يسموها جوس – المادة الي يخلوها بالفيب )
– بالنسبة للبالغين، الي يريدون يتركون التدخين ويرفضون استخدام الادوية العلاجية الي تساعد على ترك التدخين، ماكو مشكلة يستخدمون الفيب كبديل على شرط يكونون على علم انه اكو مخاطر من المادة المستنشقة من الفيب بعدها ما مكتشفة وانه فعالية الفيب بمساعدتك لترك التدخين غير أكيدة ، يعني ما ينطونك بيها ضمان ، اما الي تارك الجكاير فالنصيحة هي انه ما يدخن فيب اساسا ويبقى على ادويته المساعدة بترك التدخين
– الفريق ينصح بعدم خلط المواد ( الجوس ) او تصنيعها محليا ابدا ابدا واستخدام المواد المصنوعة من قبل الشركات فقط
– الفريق ينصح الشباب والبالغين الي ما يدخنون انه ما يدخنون فيب أبدا لانه يسببلهم ادمان عالنيكوتين وبالنتيجة يتحولون عالجكاير و الأمان ماله مجهول لحد الآن .