بخصوص اللقاح استرازنيكا

اللقاحات الموجودة تختلف عن بعضها البعض ب آلية الصنع
وبالشركة المنتجة و بالدولة الي انتجت اللقاح
مثلاً
شركة فايزر امريكي – شركة امريكية معروفة وعدها ادوية هواية وعدها علمائها الي يشتغلون على ابحاث ويكتشفون ادوية ولقاحات
سينوفارم صيني – شركة صينية هم عدها جمهورها و علمائها
استرازينكا بريطاني – وهاي هم كذلك وطبعاً شركة عالمية راقية ادويتها كلش غالية مثل فايزر بس بريطانية
الفروقات بين اللقاحات مثل الفروقات بين الموبايل السامسونج و الموبايل الايفون
اثنينهم موبايلات ، بس كل واحد اختلافاته عن الاخر بالشركة الي صانعته وبالطريقة الي مصنوع بيها وبطريقة العمل مالته لكن بالنهاية هي كلها موبايلات و كل شخص يفضل شيء معين
كذلك اللقاحات .. امريكا اكيد تفضل لقاح فايزر و لقاح موديرنا
بينما بريطانيا كلها لقحت استرازينكا
بينما الصين لقحوا سينوفارم
واكو لقاحات هواية غير معروفة عالمياً كل دولة تستخدم لقاحها الخاص بيها
كل اللقاحات يهدفن الى هدف واحد
وهو تحفيز الجسم لأنتاج اجسام مناعية مضادة لفيروس كورونا
بالدراسات شافوا انه لقاح استرازينكا ديسوي تجلطات بالشباب ( الي اعمارهم اقل من 40 سنة ) و بنسبة نادرة طبعاً الي هي 4 اشخاص من كل مليون شخص ( كورونا تسوي تجلطات ب 160 الف شخص من مليون شخص ) ف كالوا حتى ما يتأذى احد، خلي ننطيه بس للكبار بالعمر الي اكبر من 40 سنة
فصار حالياً انه استرازينكا ينطوه للمسنين الي اكبر من 40 سنة
اما فايزر ، مشافوا بيه هالمشاكل و لأن الدراسات عليه هواية دينطوه من عمر 12 سنة فما فوق
ف الي يلقح فايزر عادي
والمسن الي يلقح استرازينكا هم عادي
ماكو مشكلة
لأن الاثنين ديجيبون شغل و ينطون مناعة وما بيهم خطورة على المدى البعيد لأن فكرة اللقاح هو انه يحفز المناعة ويطلع ما يبقى الاثر ماله بالجسم مدى الحياة
اني لقحت فايزر ، زميلي طبيب لقح استرازينكا ، اخصائي اخر لقح سينوفارم ..
الصحيح هو انه الواحد يلقح الشيء المتوفر يمه ما يبقى ينتظر شركة معينة الا اذا اكو موانع للاستعمال مثل الحامل ميصير تلقح غير فايزر فهاي لازم فايزر .. اما اذا الشخص يصير يلقح اي لقاح فيلقح المتوفر ما ينتظر غيره