دكتور عندي طفلة عمرها ٤٠ يوم ولدتها باول ١٠ ايام بشهر التاسع هي واخوها التوام وكانت ولادة طبيعية وبنفس اليوم طلعنا من المستشفى لان كان وضع الطفلين مستقر وره ٤ ساعات اثناء الرضاعة صار عدها اختناق ووجها صار ازرق واخذناها للمستشفى كالوا تدخل خدج .. الطبيب شخص انو عدها شمرة نتيجة نقصان الاوكسجين وبدا باعطاء اللومينال وقتين مع مضاد حيوي وتقريبا بعد ٤ ايام صار عدها شمرة ثانية والطبيب انطاها فينيتوين وبقينا بالمستشفى بعدها ٥ ايام وكتبلنا خروج مع علاج لومينال ١٥ ملغم نص حباية الصبح ونص بالليل وعلاج الكيبرا ٢٥ يونت باليوم واستمرت حالتها مستقرة لحد اكثر من شهر والطبيب قرر انه يوقف علاج اللومينال ويبقى نص حباية بالليل ونزيد الكيبرا ويصير وقتين ٢٠ يونت الصبح و٢٠ يونت بالليل بعدها بكم يوم صارت عدها شمرة مرة ثانية والطبيب قرر انه نرجع على اللومينال وقتين ونزيد الكيبرا ٣٠ يونت صبح وليل … عملنا اثناء فترة دخول الخدج تحاليل كالسيوم وسكر الدم وtsbوكان كله طبيعي وعملنا سونار للدماغ وكان ايضا طبيعي … الطبيب المعالج لبنتي سالته عن تشخيص الحالة بالضبط وكالي انه مامعروف والافضل عمل رنين للدماغ سؤالي هل الرنين بعمر الشهرين يبين اذا كان هناك تلف بخلايا الدماغ ؟؟؟؟؟ وهل ممكن تختفي الاختلاجات اذا كان الدماغ سليم ؟؟
هل تختفي الشمرات عند الاطفال حديثي الولادة
شارك
اذا كانت الاختلاجات نتيجة نقص الاوكسجين فالهدف حالياً هو السيطرة عليها ..
فيما يخص ضمور الدماغ او تلف الدماغ هالشيء ميبين لحد ما يصير الطفل عمره 6 اشهر يلا يبين من خلال ملاحظة التأخر عن اقرانه و مو شرط كلهم يكونون بنفس الاذية كل طفل اذيته شكل واكو يطلعون منها سلامات
فحالياً الهدف خلي يكون هو السيطرة على الاختلاجات
والمتابعة تستمرون بيها مع اخصائي الاطفال و يفضل تخصص دقيق امراض الصرع والدماغ ( مال اطفال )