ابني عمره سنتين و ما ينام
ابني عمره 12 سنة و ما ينام
ابني ينام و يكعد
ابني يكز على اسنانه بالنوم
ابني يتحرك و هو نايم
و الاف مشاكل تخص النوم
زين لحظه
انت تعرف شنو قواعد النوم ؟
اريد من البدايه نبدي
مشاكل النوم اني و انتوا ما كانت عدنا مشاكلها من كننا اطفال الا من كبرنا و بدا السهر و غيره
تعالوا نرجع لاساسيات النوم
1. وقت النوم لازم يكون ممتع
يعني مو اهووو راح ننام
نحجي قصه
نلبسه بجامه يحبها
جو معتدل
يروح لفراشه بفراشه اللي يحبه
غرفته الخاصه اللي اختار اثاثها على ذوقه او اقلها فراشه على ذوقه
2. ما ينام و هو جوعان
موز او قطعتين بسكت شوفان او لبن او حليب قبل ما ينام
مدا اقصد العشا
لا لا وجبه قبل النوم
3. الروتين الروتين الروتين
النوم بموعد ثابت
و الكعده بوقت ثابت
يعني مو ينام براحته شوكت ما يحب و يكعد شوكت ما يحب
4. من ينام لازم كل البيت ينام وياه
مو انت سهرانه على التلفون
و تكولين هاي ليش ما نايمين !
غير انت كاعده
هذه بصراحه مشكله بالبيوت الكبيره لان اكيد مو الكل ينام بوقت ثابت
5. الشمس الصبح مفعولها راح يستمر لليل
حتى بعض النباتات تنام من يصير الظلام
فلذلك نخلي بعض الحركه الصبح مع تعرض كافي للشمس
اكو فد شي بجسمنا اسمه الساعة البايلوجيه
هذا يتنظم من نتعرض للشمس الصبح
و نطفي الاضاءه باليل
6. التلفزيون و الموبايل و الراديو اكبر مخرب لنوم الاطفال
سدي التلفزيون او الموبايل او الايباد من ال ٤ العصر و شوفي الفرق
7. لا للتدفئه الزايده
لا للبرد الزايد
لا للملابس اللي تحصر جسمه
لا لكثر الاغطيه
بالرضع لا للكماط الشديد
اني مع الكماط بس ما يضب الايدين
8. الشاي البيبسي و النسكافيه بيها كافيين
كافيين يعني تخليه يكعد من النوم
كافيين يعني سهر
و بعدين تعالي هنا شنو معناها طفل تحت ١٨ سنة يشرب بيبسي ! او مشروب طاقه؟
9. النوم ابدا ما لازم يكون تجربه سيئه
يعني لا تعاقب قبل النوم
لا تزعله قبل النوم
لا يروح لفراشه و هو زعلان
10. النوم سهل لو تسهلوه و تعلمون نفسكم على ان الصبح للحياه و الليل للنوم
بغداد و بعض العواصم العربيه الاخرى ما تنام
في حين كل اللي مسافرين خارج البلد يشوفون انه عدا المناطق السياحيه الساعه 8 ليلا الكل داخل بيوتها و نايمه
تنظيم النوم يبدا من تنظيم نومك انت و الاب
د. سيف سمير البياتي اخصائي طب الاطفال
