اختلاط الحلمه
Nipple confusion
الاسم مثل ما هو واضح هو تفضيل الرضاعه الصناعيه على الطبيعيه او بالعكس و ترك و رفض الطريقه الاخرى للرضاعه
يولد الطفل و هو يعرف ياخذ الحليب من امه هذه من الاولويات و الاساسيات اللي ما يختلف عليها اثنين و الا من وين جتي هذه البشريه من عصر ادم لليوم الحالي
المشكله دا تصير باول رضعه او اول رضعات
نجي و ندخل حليب صناعي بالمميه راسا
الطفل ينسى كل اللي تعلم عليه و يرضع الحليب الصناعي
تجي تنطيه الحليب الطبيعي ينصدم
يكول زين هسه شاسوي ؟
اكيد يختار الحليب الاسهل
و اكيد هو الرضاعه الصناعيه
اي اكو اطفال يرفضون الحليب الصناعي
بس الاكثر هو هذا الخلل اللي يصير
لسه اتذكر نقاشي ويه الممرضه من كالت وين مميه طفلتي الاخيره و شرحتلها عن هذا الموضوع و عن اختلاط الحلمه
من حق الطبيب المتواجد بصاله الولاده يتاكد انه الطفل يرضع او لا
بس ما ممكن يجرب ينطي الطفل الرضاعه بكوب او سرنجه ؟
للي يتفاجيء انه ممكن الطفل حديث الولاده يرضع من الكوب اكوله اي يكدر يرضع الطفل حديث الولاده من الكوب و اكو اكثر من فيديو باليوتيوب يشرح الكيفيه
ما علينا
شون نتجنب حاله اختلاط الحلمه؟
1. نبدي صح ما نرضع الا من الثدي اول ما تصحين من العمليه و مالكم علاقه بعد ٦ ساعات يلا ترضع و غيرها من الاشاعات
الحليب متكون من اشهر طويله
يعني ما كاعد ينتظر التخدير ياثر عليه
اول ما تصحين ارضعيه
2. من ندخل حليب صناعي استعدي لفراق الاحبه
يعني استعدي لمغادره الرضاعه الطبيعيه
3. ما نستخدم حليب صناعي الا بعد شهر
و الافضل ما نستخدمه اصلا اذا كان النمو ماشيه اموره
4. من تنطين حليب صناعي تكدرين تنطيه بالكوب او السرنجه و اذا ما تعرفين بالمميه انطيه بس خليها بشكل افقي تكون ممكن تقلل من اختلاط الحلمه
و بالاخير نكول
للي نجحوا بالرضاعه الطبيعيه الف الف مبروك انطيتي الذهب
و للي اختاروا الرضاعه الصناعيه حياتك خياراتك
د. سيف سمير البياتي اخصائي طب الاطفال
