اذا طفلك يتمتم و سبب التمتمة مو سبب مرضي انما خوف وقلق هاي النصائح ممكن تفيدك بالتعامل وياه
١- احجي وياه بهدوء وبطىء وخلي توقفات بين جملك هالشيء يعلمه انه الكلام مو بالسرعة ولا ب الاستمرارية انما عادي يوكف بين جملة وجملة و عادي انه يحجي بطيء لانه من يريد يحجي بسرعة مراح تسعفه الكلمات فتشوفه يتمتم
٢- خلي جو البيت يكون هادىء مو كله مشاحنات ومشاكل تبعث الخوف بنفسية الطفل لمن يريد يعبر عن نفسه
٣- انتبه للكلام الي ديكوله وباوع بعيونه ولا تركز بطريقه نطقه للكلام (التمتمة) هالشيء يتطلب منك صبر وانتباه، لا تخليه يحس انك مليت او ضجت من تمتمته
٤- لا تكوله على كيفك احجي، او عيدلي الي كلته بوضوح او فكر بالحجي قبل لا تحجيه او اخذ نفس، هالكلام رغم نيته الزينة لكنه مراح يساعده حتى توكف التمتمة مالته، ولا تقاطعه او تسأله لمن يحجي خليه يكمل الي يريد يكوله على راحته
٥- لا تحسسه او تشكي للناس وهو يسمعك انه يتمتم هالشيء يحسسه انه التمتمة عيب عنده.
٦- قلل الشد النفسي عند طفلك أثناء الكلام، كمثال: بدل ان تكوله (شسويت بالمدرسة اليوم؟) وتخليه يخاف يجاوبك، كوله ( لعبت اليوم بالمدرسة اكيد جان هالشيء حلو وفرحك).. بنفس الوقت لازم تلاحظ يا مواضيع تخليه يتمتم حتى تتجنبها (غالبا يتمتم لمن يخاف او مسوي مشكلة)
بالاوقات الي تعرف انه تمتمته راح تزيد حول الموضوع الى نشاطات ما تتطلب كلام
٧- اذا هو ضايج من التمتمة مالته افتح وياه الموضوع وطمنه انها شيء عادي و بسيط اما اذا ميعرف انها شيء مو طبيعي لا تفتح الموضوع وياه لحد ما تروح لاخصائي سمع و تخاطب
٨- استغل وقت الاكل للحوار العائلي بعيدا عن ضجيج التلفزيون والموبايلات
هذا المنشور تكملة للمنشور السابق الي هو بعنوان ( تمتمة الأطفال) حتى تعرف شوكت تكون طبيعية وشوكت تحتاج مراجعة أخصائي
———
حساب التوعية على الانستاغرام
https://instagram.com/dr_salmand?igshid=qbd41hnknyb3
د. سلمان داود
مقيم اقدم اطفال
