اعرفكم على جهاز لطيف خفيف سهل الحمل اسمه السبيسر و الماسك المرفقه صورته بالبوست
السبيسر هو مكان يحتفظ بالعلاج اللي يطلع من البخاخ
السبيسر مثل ما تشوفون بيه نهايتين
نهايه ينربط بيها جهاز البخاخ اليدوي
و نهايه ترتبط بالماسك او القناع اللي يغطي انف و فم الطفل
البخاخ اليدوي اللي دائما نستخدمه بالاطفال هو بخاخ وقائي او ممكن علاجي
يعني ننطيه صباحا و مساءا و لمده طويله اشهر او سنين
❤يفيد الاطفال اللي عدهم حساسيه مزمنه للقصبات
شنو الفائده من جهاز السبيسر ؟
ببساطه ما يحتاج اي جهد من الطفل و احيانا حتى الشخص البالغ اللي ما يعرف شون يستنشق البخاخ اليدوي
يزيد كميه الدواء الواصل للقصبات
❤شون نستخدم السبيسر ؟
الطريقه كلش سهله
اولا نرج البخاخ اليدوي ١٠ ثواني
ثانيا اذا ما مستخدم البخاخ فتره طويلة رش ٣ بخات في الهواء
ثالثا ركب البخاخ اليدوي بجهاز السبيسر
رابعا خلي الماسك على وجه الطفل و انتظر الطفل ياخذ ٥ انفاس
تقريبا احسب من ١ الى ١٠ مره اخرى
الجهاز جدا بسيط
و اللي خليتهم عليه و بالتزام تام
مو بس تحسنوا
و انما سوبر تحسنوا
بس يحتاج نعرفله
❤اكيد راح يتوارد سؤال شنو فرق البخاخ اليدوي عن جهاز التبخير الكهربائي ؟
البخاخ اليدوي ينطي جرعات خفيفة مفيده للوقايه و احيانا للعلاج
❤شوكت يخليني الطبيب عليه ؟
هذا قرار يخص الطبيب و مريضه
يعني كل حاله هي منفرده
احيانا يكون القرار بس جهاز تبخير
و احيانا نلجا للسبيسر
و مثل ما كلت كل مريض حاله منفردة
❤يتعود عليه ؟
طبعا لا
هذا عدم المعرفة السيء بخصوص البخاخ و جهاز التبخير اللي طلعتها جده من جداتنا مو عيب نصدك بيه ؟
راح نعبر ٢٠٢٠ بعون الله
لازم نغير قناعتنا الخاطئه ببعض الامور الطبيه
ماكو شي اسمه يتعود عليه
ادويه الادمان تلكوها بالدرابين المظلمه و تجينا تهريب من الارجنتين
المهم لا ما يتعود عليه
❤فيديو كيفيه استخدام السبيسر بالتعليقات
❤يصير اروح اشتريه و انطيه لطفلي ؟
طبعا لا
اني مخلي ورقه يمي معلكها بالحايط لكل عمر بخصوص البخاخ اليدوي و جرعه لان هوايه جرع بيه
خاف انسى ارجعلها
د. سيف سمير البياتي
اخصائي طب الاطفال
