اعرف انه سيتم الهجوم على البوست
بس ناخذ المعلومه الطبيه و نستفاد منها
ام من الأمهات تراجعني بطفلتها من يوم صرت طبيب
و صرت طبيب العائله المقرب
الأم و الاب و اطفالهم صاروا جزء من حياتي اليوميه و كلش قريبين مني
اول طفله الها عمرها الان 15 سنه
و تخيلوا صارلي شكد طبيبها
المهم هذه الأم الله رزقها ب ٤ وردات بنات
سألتني قبل فتره
انه تريد تسوي طفل
لان كعراقي ابو الجهال يريد ولد
اني اعرف ان عمرها عبر ال ٣٥
سالتها شكد عمرك
كالت ٤١ سنه
كلتلها ما انصح
كالت ليش دكتور
كلتلها علمود متلازمه داون
و شنو الرباط؟
الرباط انه الأم من تعبر ال ٣٥ احتماليه ان تولد طفل مصاب بمتلازمه داون تزيد إلى ١ لكل ٨٠ حمل
مقابل ١ لكل ٣٠٠ حمل اذا عمرها بين ٢٠ إلى ٣٠ سنه
قبل ايام جابوا الصبي
و اجه ولد
جابته افحصه
الطفل مصاب بمتلازمه داون
سويت كل الفحوصات و تأكدت
و الطفل عنده تشوهات بالقلب و خمول بالدرقيه
قبل 5 دقايق راسلتني الأم
كالت دكتور ما سمعت كلامك
انشر تجربتي بلكي احد يمتنع عن الحمل و هي كبيره
طبعا اكيد راح تلكون تعليقات مثل بيبتي عمرها ٦٠ سنه و جابت كلشي ما بيه
و العلم يكول النسبه تزيد مو اكثر
زين اذا اني حامل و عمري أكبر من ٣٥ سنه شاسوي
خبري طبيبتك النسائيه بمخاوفك
و خلي تحددلك موعد لفحص الداون
امهاتنا
خواتنا
حالات متلازمه داون بازدياد لان اعمار الأمهات اللي اكبر من ٣٥ و يصيرن حوامل كاعد يزداد
موضوع اللي تزوجت و هي بعمر أكبر من ٣٥ اكيد ما انساه بس خلي ببالك الفحص
الطب ما بيه غير لغه الأرقام
و الأرقام لا تكذب
د. سيف سمير البياتي اخصائي طب الاطفال
from د. سيف سمير البياتي