اكو اشياء بصراحه بالوعي الشعبي اتفاجيء بيها
يعني ما يرادلها طبيب يكولها
اشياء واضحه المضار
يعني مثلا
اب جاب ابنه عنده سمنه اكوله شياكل يكولي و الله كلشي ما ياكل
اني ما كنت متصور انه العراقيين هيجي عايشين ع العصير فما سئلت على العصير او الشربت
قست ضغطه مرتفع و هي نتيجه متوقعه عند الاطفال البدناء كلتله ضغطه صاعد
كال اي دكتور ادري اني اكوله الضغط من البيبسي
هنا تذكرت انه اسئل عن المشروبات؟
فكان الجواب : دكتور يشرب بطل ابو اللتر يوميه وحده !!!
الطفل عمره 5 سنين وزنه 35 كيلو
.
.
بعدها بكم يوم شفت طفل آخر وزنه 33 و عمره ٣ سنين و هم السؤال شون اكله ؟
دكتور ما ياكل
اوك و شيشرب دكتور ما يشرب اصلا لا بيبسي لا عصير
اني كلت اوكي الامور بالسليم
الام كملت و كالت دكتور هو بس افطمه يضعف !!
تفطميه؟
ليش هو بعده ؟
اي دكتور يشرب 8 مميات كل مميه 8 ارقام باليوم
يعني يشرب ٦٤ رقم حليب
يعني لترين حليب يوميا و تكول ما ياكل
بالمناسبه نسبه دمه كانت 8
.
.
بعد الحالتين السابقات عن مصادر الطاقه اللي ما تنحسب كمت اسئل و ياريتني ما اسئل
و طبعا اسئل من يكولون الطفل ما ياكل خطيه
تصدكون اكو ينطون 3 باكيتات حليب لطفل !!!
تصدكون اكو ينطون باكيت عصير يوميا لطفل عمره سنتين!!
تصدكون اكو ينطون بيبسي لطفل عمره ٨ سنين ويه كل وجبه علبه كامله !
و الاطفال طبعا بدون صحه و فقر دم و وجوههم صفره
زين ليش؟
هذه الاشياء يحتاج طبيب يكولها؟
يحتاج احد يكولها؟
العصير و الحليب و الحلويات اكو احد ما يعرف انه تسد الشهيه؟
ما اعرف و الله
نتمنى الحال يتغير الى افضل حال
د. سيف سمير البياتي اخصائي طب الاطفال
المعلومات بالبوست هي اساس التغذيه لاطفالكم احفظوها الله يخليكم
