اكو بيكم ما سامعين بعملية تبديل دم الطفل الي عنده ابو صفار ولادي
راح اشرح عنها شوية
لمن يجي طفل عنده ابو صفار جدا عالي نتيجة اختلاف فصيلة الدم بين الام والطفل، نحاول وياه بالعلاج الضوئي مال المستشفى اذا ما فاد
اكو شيء بالطب اسمه تبديل دم الطفل
يعني نبدل دمه ( المليان مادة ابو صفار ) بدم جديد ( ما بيه مادة ابو صفار )
شون نبدله؟
الطريقة الي نستخدمها هي انه نشد للطفل صوندة بيها صمام ثلاثي بالوريد الموجود بالسرة ( الوريد الي جان يربط الام بالطفل عن طريق الحبل السري ) لانه اضخم وريد بالجسم نكدر نوصله
نسحب ٥ سي سي من الطفل و نشمره
ونحطله ٥ سي سي من الدم الجديد
ننتظر الدم يختلط مع بعض ونعيد السحب مرة أخرى وهكذا لحد ما يتبدل دم الطفل بدم ما بيه ابو صفار
هالعملية ممكن تنزل ابو صفار من ٢٠ الى ١٠ مباشرة
يعني فد شي من صدك ينقذ الطفل
– طيب بيها خطورة؟ خطورتها مثل خطورة نقل الدم، بحالات نادرة جدا يصير تحسس بس مدام الطفل يمنا بإذن الله نلحك ننقذه اذا صار تحسس
اكو امهات يظنن انه تبديل الدم يخلي الطفل يصير معوق او يخليه يموت
وبالحقيقة مو تبديل الدم يسبب العوق، الي يسبب العوق هو انه الاهل يتأخرون يلا يجيبون الطفل للمستشفى، او انه يبقون يرفضون لحد ما يتاذى دماغ الطفل فما نلحك ننقذه حتى لو وافقوا نبدل دمه
و تبديل الدم ما يسبب الوفاة بشكل مباشر انما سبب الوفاة اغلب الحالات هو ابو صفار الي ضرب دماغ الطفل
مرات الطفل الي يجيبوه اهله من وكت نبدل دمه مرتين او ثلاثة وبالنتيجة يطلع من المستشفى للبيت مثل الاسد مشافى معافى كلشي مبيه
قبل فترة طفل حولته باسعاف ووصيت اهله كلتلهم اذا كالولكم تبديل دم وافقوا
وفعلا ورة كم شهر شفت جد الطفل كعد يتشكر انه بدلو دم طفلهم مرتين وهسة كلشي مبيه مثل الورد
لو رافضين تبديل الدم جان صار ابنهم معوق اذا بقى عايش
——
حساب التوعية على الانستاغرام
https://instagram.com/dr_salmand?igshid=qbd41hnknyb3
د. سلمان داود
مقيم اقدم اطفال
