الاسهال عدوى
كان بوست قصير جدا عن موضوع طويل جدا
و الكل كتب بيه ارائه
ما يؤلم حقيقه ان الأغلب ما يعرفون ان اغلب حالات الاسهال هي عدوى
و الهدف من البوست هو المراجعه لما صار قبل الاسهال او القيء
يعني من يصير عند طفلك اسهال او قيء او الاثنان معا
تعاي نراجع حتى نتوقى للمره القادمه
يعني
نراجع أساليب التعقيم للمميات؟
هل تغلين او تعقمين المميه بالمعقمه قبل كل رضعه ؟
كم عدد المميات اللي عندك ؟
تلحكين تفورين كل المميات؟
من وين طلبتوا اكل اخر مره ؟
هل الطعام بره البيت ؟
اكو جبس بالموضوع قبل ما يصير الطفل قيء او اسهال ؟
اكو طعام بمطعم ؟
اكو اكل دلفري ؟
زين ليش اكتب هذا البوست
هذا البوست تذكير و توعيه و وقايه
احنا ليش كلشي نذبه برأس السبلت
كورونا من السبلت
انفلونزا من السبلت
اسهال من السبلت
نشله من السبلت
بلاعيم من السبلت
ادري هو سبلت لو مجمع مال فايروسات؟
اغلب امراض الاطفال عدوى
اي اكو أسباب أخرى للاسهال بالأخص المزمن ( اللي يطول اكثر من اسبوعين ) مثل داء الحنطه و متلازمه كرونز و غيرها
بس تذكر دائما بأن الاسهال عدوى
و راجع أمور التعقيم و التنظيف و أمور غذائك و المطعم اللي تطلب منه و الجبس السيء مره و اثنين و ثلاثه اذا صار بطفلك اسهال
د. سيف سمير البياتي اخصائي طب الاطفال
from د. سيف سمير البياتي