الاطفال ليسوا كبارا بحجم اصغر
Kids are not small adults
عباره تسمعها من كل استاذ و محاضر و طبيب و ممرض اول ما ينطي محاضره عن طب الاطفال
القصد منها انه ابدا لا تتعامل ويه الاطفال كانه هم كبار لا بعلاج و لا بجرعه و لا باي شي اخر
تدرون بعض العلاجات بالاطفال تحتاج جرع من الكبار ؟
منها مضادات الحموضه مثل الاومبرازول مقارنه بالوزن !
مصطلح ملعقه و خاشوكه و استكان و قبغ
ملغي من زمن
تعلمي الجرع بالسيسي
تعلمي ان لكل وزن جرعه مناسبه
اتالم من اشوف ام تنطي لطفل عمره شهر تحميله في حين اقل وزن للتحميلة هو ٨ كيلو او ممكن اقل بشويه اذا طبيبك قرر
اضوج و انفعل من اشوف هذا الفرط بالادويه و العلاجات و الابر
تكعد الام اكولها شنطيتي
تكول بندول اكول عفيه
وره اربع ساعات تحميله اكول عفيه
و فتحت شراب التهابات ابو الفراوله اكول ليييييش
مو صخن !
زين من يصخن هم معناها نقص شراب التهابات ابو الفراوله؟
لعد مريض الكارونه هم ننطي شراب التهابات ابو الفراوله من يصخن و يصير اوكي ؟
الحراره في اغلب حالاتها فايروسيه
و اعطاؤك شراب الالتهاب دون مشورة طبيه راح مجرد يضعف المناعه لا اكثر
و اكيد راح تبدي معزوفه ( منو ينطي شراب الالتهابات غير الاطباء اكولك طبيبك اعرف بحاله طفلك )
البوست عن صرف المضادات الحيويه دون مشورة طبيه
اعرف ان هذا البوست راح يدخل من هذه الاذن و يخرج من الاذن الاخرى
بس نذكر عسى الذكرى تنفع المؤمنين
د. سيف سمير البياتي اخصائي طب الاطفال
