البرتقال للاطفال !
البرتقال فاكهه شتويه و مشهوره و غنيه بفيتامين سي و سهله العصر
🍊شنو احسن عمر لادخال البرتقال للاطفال ؟
بصوره عامه فان الطعام و إدخاله يكون باي وقت من عمر ٤ إلى ٦ اشهر
و تعرفون انه ماكو اي مانع لادخال الطعام باي وقت و اي نوع و بدون جدول معين
بس البرتقال مشكلته انه هو من عائله الحمضيات و الحمضيات ممكن بكل بساطه تسبب حموضه معده و زياده بالارتجاع و دامها حامضه فأكيد تسبب طفح بمنطقه الحفاظ و تقشرات بالشفه و ما حولها
بصوره عامه يفضل تأجيلها لما بعد عمر السنه
🍊 بس اني مصره انه ادخل البرتقال بعمر ٦ اشهر شون؟
اذا ادخليها بكميات معتدله فقط و انتظري ٣ إلى ٥ ايام و راقبي الموضوع لان ممكن تسبب طفح الحفاظات فيما بعد
🍊 شنو فوائد البرتقال؟
البرتقال معروف انه بيه فيتامين سي
بس البرتقاله الوحده بيها الياف بحيث تعادل ١٠ بالميه مما يحتاجه جسمك
بيها قيمه لا باس منها من الكالسيوم
🍊 شون اقدمها للطفل؟
ممكن اقدمها بعد تقطيعها و ازاله الحبوب و القشر منها
ممكن اقدمها مع الجزر مثل البيوريه و ممكن تحضير ايس كريم لذيذ من اللبن و البرتقال ممكن خلطها ويه الافوكادو اة حتى مع الدجاج لاضافه طعم حلو
🍊 و العصير شنو رايك بيه ؟
الاكاديميه الامريكيه لطب الأطفال خصمت الموضوع و كالت انه ممنوع العصير قبل عمر السنه
🍊 و بعد السنه؟
كلما اقل كلما احسن
العصير ينزع الألياف
و الالياف صحيه جدا لصحه الجهاز الهضمي
🍊 ممكن احضر العصير بتقشير الفاكهه و بعدها اخليها بالخلاط مو اعصرها؟
اي ممكن
🍊 شنو استخدامات البرتقال الطبيه؟
اولا غنيه جدا بفيتامين سي بحيث برتقاله وحده تكفيك احتياجك اليومي من هذا الفيتامين لذلك ماكو داعي تاخذ فيتامين سي إضافي اذا تناول برتقاله
ثانيا البرتقال مضاد للامساك كونه غني بالالياف لذلك لا تحرم نفسك و طفلك من الألياف اللي بالبرتقال عن طريق عصرها و إنما تناولها كامله
🍊 هل البرتقال او عصيره جيد للاسهال؟
لا و السبب ذكرته بالبوست
البرتقال سيء للاسهال لانه مسهل
🍊 هل البرتقال جيد للقيء؟
لا لان حامض و يزيد القيء
🍊 محاذير من إعطاء البرتقال ؟
الطفل اللي عنده ارتجاع و الطفل اللي عنده طفح حفاظات و الطفل اللي عمره اقل من سنه
🍊 هل يشمل هذا البوست باقي الحمضيات مثل اللالنكي و الليمون الحامض و الكريب فروت ؟
نعم
د. سيف سمير البياتي اخصائي طب الاطفال
🍊
from د. سيف سمير البياتي