#التعبير
قبل فترة ابني جان رايح بيت جده، ودينزل الدرج وزلكت رجله ووكع متدحرجا 😅
الحمد لله عدت سلامات والله ستر
وراها زوجي ديحجيلي الموقف، وابني جان يلعب بعيد
من سمع دنحجي بالموقف، عاف اللعب واجى كلي :”وكع من درج وصار واوا” وياشر على نفسه
طبعا بهذا الموقف نقطين مهمه:
🛑الأولى: مدام الطفل بنفس المكان حتى لو الطفل ملتهي بالف شغله(شغلات طبيعية مثل “الألعاب” مو مخدرات مثل التاب والتلفزيون)، هو كاعد يسمع فلازم ننتبه لكلامنا كلش زين
سالفة بعده صغير وميسمع (غير صحيحه)
صغير وميسمع هاي لطفل حديث ولادة فقط(حوالي جوه ال6 شهور)
مو طفل عمر سنتين ونص وفوك.. هذا يسمع ويسمع كلش زين
فلازم ننتبه للكلمات الي نكولها
🛑الثانية: الي هو التعبير،
من اجى وديحاول يحجي الموقف ،
ماله داعي افشلة واكله أي ديلا دريت
لو أي أي يلا روح كما لعب
او يا عزه ويبدي اللطم والصريخ وشلون وكعت وسوده عليه وكله صوج…… وصوج…….. وصوج……… الي منتبهوا عليك 😂😂😂
🌼🌼التصريف السليم والبسيط:
اول شي نباوع بعين الطفل وننطيه اهتمام كامل، ونركز وياه بكلامه.. ونخلي يكول الي يريد يكوله، ومن يكمل نعيد الكلمات وراه بصيغه صحيحه، وبصوت استفهام وتفاعل .. وحيرجع هو يعيد، ونرجع نعيد وراه
وحيرجع يعيد….
ونرجع نعيد وراه …
ونبدي تعاطف اكثر، مثل ياحبيبي اسم الله عليك، ونطرح سؤال
وهسه راحت الواوا؟؟
هو حيجاوب ويانا ويكول أي راحت
او لا واوا هنا
نبوسها .. وغالبا حينتهي الموقف هنا ويروح من وحده يلعب
اما طريقه محاوله إسكات الطفل، أو مقاطعته، أو الكلام عنه، أو تسفيه كلامه، أو تشتيت انتباهه (بحجه خطيه لا يتذكر ويتاذه)
فحيوكعنا بالمشاكل الاتيه:
🔸1.اذا سكتناه … حيصير عنده ضعف بالتعبير (عن طريق الكلام)، أو يفقد القدره عن التعبير ويكضيها بس بجي
🔸2.مقاطعتة (والكلام عنه).. حيخلي يحس هو ميعرف يتكلم ولازم احد يتكلم عنه
🔸3.تسفية كلامه (من تكله: شخبصتنا اصلا متاذيت) حيفقد الثقه بكلامك، لان هو ديحس بالم! وانت ترفض أن تعترف هو ديتالم، فبالتالي يعتبرك شخص كاذب (لان دتكول كلام مو حقيقي) انت تكول متاذي! بس هو ديتاذى 😅
🔸4.تشتيت الانتباة.. حيخلي يرجع يحاول يكولها ،، خصوصا المواقف المخيفه (وكعه من مكان مرتفع, مشاهده دم غزير لأول مره، مشاهده موت حيوان، مشاهد عنف وغيرها) لازم يعيش الموقف ويعبر عنه ويتخلص منه، كبته بداخل نفسه وتشتيت انتباهه بكل مره يحاول يكوله، حينزل المشهد للعقل ال لاواعي
وبالتالي تبدي تطلع عدنا مشاكل امثال التبول ال لا ارادي، التأتأة، قضم الاظافر ، مص الاصابع خصوصا لاعمار أكبر من 5 سنوات، الكوابيس الليلية وغيرها
⭐المختصر⭐
من طفلك يحجي ، اسمع له وتفاعل وياه وانطي مجال حتى لو عاد الف مره،، اسمع اله … هو ديعبر،،
ديختخلص من مشكلتة ويحاول يعبر عن انفعاله وعواطفة،، ديحاول يسوي الصح،
🚫”اسكت وكافي وشخبصتنا”،، هذا تجاوب خطأ 🚫
وكلما تكرر كبت التعبير ، كلما زاد احتماليه ظهور المشاكل (الي ذكرتهن فوك👆)
المشاكل هاي متطلع بيوم وليله، تطلع بعد زمن طويل من الاخطاء التربوية
شجع طفلك يعبر،، اسمع لطفلك،، تفاعل وياه 👍
د.اسماء إسماعيل البدري