#التربية
#العناد
الجزء الثاني
تكلمنا بالجزء للاول عن العناد وان هو غالبا يكون خلفه شي ، يا اما هو مرحله عمرية طبيعية
او محاولات للفت الانتباه وشرحنا حتى نتخلص من العرض (العناد) لازم نبحث عن السبب ونصلحه
اليوم نسولف عن عناد الطفل المتمثل ب:
🔹عدم تنفيذ الطلبات
اول نقطه واهم نقطه
(اذا اردت ان تطاع ،،،،،، ف امر بالمستطاع)
والمستطاع حسب طفلك مو حسب عمره ولا اقرانه
وهذا يجرنا الى ان نكون على علم بقدرات الطفل ومتابعة نموه وتطوره لان ممكن هو يعاني من حاله مرضية او عله معينه
والاهل يكولون (يعاند)!!
على سبيل المثال انتشر قبل فتره فديو تعنيف طفلة بعمر المشي , جانت متكدر تمشي، والاب جان يعنفها بطريقة كلش بشعه (وحسب نظرية هيج اهل )
هي تكدر تمشي بس كاعد تعاند!!!
فشنسوي؟
نعذبها حتى تخاف وتبطل عناد (واقع حقيقي بدون اي مبالغة)
المهم
اذا طفلك عبر عمر المشي وهو مايمشي،،، هو عنده مشكله او تاخر بالنمو والتطور
مو عناد!
اذا طفلك بعمر يتكلم وهو ميتكلم ،،،
عنده مشكله ميكدر يكون مخرجات بسهوله يواجه صعوبه بالغه في ترتيب الكلام واطلاق الصوت من الرئتين لاصدار الصوت (هو يعرف مفردات نعم ويفهم نعم بس اخراج الصوت مو سهل بالنسبة اله)
مو كاعد يعاند!!!!
(الكلام، المشي ) هي مخرجات يتمكن منها الطفل من يكون على قدر من النمو العقلي وصحته الجسدية تمام
(نتكلم اكثر عن هذا الموضوع لاهميته في بوست اخر)
فاذا هو عنده صعوبه مو نبقى نكول له احجي يلا / ويلا امشي
و لتعاند!
ممكن جدا كثره الملحه تخلي ينفر من المحاولة لان يحس ضغط قوي
الطلبات البسيطه (بنظرنا) ممكن هي معقده بنظر الطفل لذلك يحتاج مساعده او (مسانده)
انتي وبنتج بالمطبخ
وكلتي روحي بنتي غسلي ايدج
حتبقى صافنه بمكانها
(ممكن جدا ما تعرف شلون تغسل ايدها وهي هنا بالمطبخ!)
ببساطه كبداية نبدي نساعد ونساند
بان ناخذ الطفل من ايده ونكول يلا نروح نغسل ايدنا
نخلي يسوي اغلب الخطوات اذا جان قدرته مناسبه وجودنا حيكون (مساند)
اغلب طلبات من هذا النوع الي
(يصفن) بيها الطفل هو مكاعد يعرف شلون يسوي الطلب بالضبط فنبدي وياه نسوي سوا ونوجهه للطريقه باسلوب (عملي)
مره على مره حيضبطه اكثر
وهذا ايضا ينطبق على باقي انشطه الحياة العملية
(لم المكعبات، تعديل الفراش ) وغيرها من انشطه الحياة العملية فهاي تتم بالتدريج
وحسب قدرته ايضا
اذا تريده يشيل 100 مكعب
ابدي اطلب منه يشيل مكعب واحد فقط
شعوره بالانجاز لاتمام مهمه بسيطه هو الدافع الي حيخلي يحاول يتم مهام اصعب
من تصعد مستوى المهمه
🔹🔹( شاركه) و (ساعده) و (سانده)
ابدأ اولا …. ح يتشجع
يعني تعال نلم سوه
او
🔹🔹(جزء المهمه)
يعني مثلا كله انطيك وخلي بالصندوق
او
🔹🔹(اضف عنصر المرح)
مثلا يركض ويلم او يرقص ويلم او سباق او اضافة الخيال (هاي احنا بالغابة ولكينا احجار خل نلمها ) /اطلق العنان لخيالك
اما بالنسبة للطلبات اليومية
حتحتاج تحجي هواااااي ويتعب حلكك هواااي
لتفسير كل طلب
مثلا غسل ايدك
حيكول ليش؟
نحجي المعزوفه مال جراثيم 😂
ومرات ميكول ليش فاحنا بدل منبقى نعيط ونكول لتعاند نبدي نشرح ونسولف الى ان يتحرك ويروح يغسل
نقطة أخرى مهمه جدا جدا
هواي اهالي يتصورون الطفل يعاند وماينفذ وهو بالحقيقة مجرد مشغول وما انتبه للطلب
حتى تتاكد طفلك استقبل الطلب
لازم عينك بعينه والافضل تلزم ايده وتحجي هيج تتاكد هو سمعك
واذا شفته مندمج بلعبه معينه انتظر قليلا من فضلك من يكمل احجي وياه بنفس الطريقة (تواصل جسدي+ بصري)
خصوصا للاعمار دون 6 سنوات
اما الطفل الي ماخذ العناد بشكل مبالغ و24 ساعه يكول لا وما ومتعصب (واحنا شغالين على التعويض العاطفي او حسب شنو الحاجه مالته ، يعني هاي الخطوه اضافيه وليست اساسية ،،، الاساس علاج السبب وليس العرض)
نبدي نسوي طريقة التخيير
مثلا تلم العابك لو المها اني واضمها وبعد متلعب بيها؟
ونكون فعلا جادين مو مزح
ما لمها خلص
(هو اختار)
ونفذ الخيار مالته تنضم الالعاب
اذا ماعندج نيه تضميها صدقا لاتطرحين هيج طريقة لان حتصير كذب وحيشوفه بعينه ويتاكد انتي ابدا مو جاده وكلامج هو فقط كلام مابي اي فعل
هنا نبدي نقوم العناد ونحدده ،ننطي خيارات معينه وواضحه اذا ملتزم بيها هو يتحمل النتائج
مره على مره ح (يتربى) ويعرف حدوده زين ويعرف عواقب كل خيار
واكرر لازم تكون واقعية وتتنفذ ومو انتقام ولا عصبية ولا توتر
سؤال ، اختيار، تنفيذ
د.اسماء اسماعيل البدري
from د. سيف سمير البياتي