#التربية
(اني امه واني ادرى بمصلحته)
هواي نسمع هاي الجملة ، كنوع من التبرير أو الانهزام من المسؤولية
كمثال،
🔸ليش ضربتي؟
◀️لان ديسوي غلط ولازم اربي، اني أمه واني ادرى بمصلحته ! 😶
🔸ليش تنطي ممه من أول يوم؟
◀️علمود يتعلم عليها باجر عكبه خوما اكضيها سهر! اني أمه واني ادرى بمصلحته!
🔻ليش ديباع موبايل !! تره عمره بعده 8 أشهر!
◀️مو خطيه يشوف جهال تباع وهو مايباع!! ما اريد تبقى بنفسه!! ني أمه وادرى بمصلحته!!
🔸ليش تريكي عصير وجبس وكيكة ام الربع وتغذي اندومي وتعشي 3 ممات وثارده بيهن باكيت بسكت وهو عمره 3 سنوات !!
◀️مو حته يشبع زين ويجرها نومه للصبح، والحليب زين ،،، اني أمه وادرى بمصلحته ! 😟
🔸ليش يا عزيزتي الطفل سهران لل4 فجر؟؟؟
◀️مو حتى يبقى نايم الظهر والحك اسوي الغده وما يبقى يحوص بين رجليه .. أخاف عليه من الطباخ!! اني أمه واني ادرى بمصلحته !!
وتطووول قائمه الاعذار، لتبرير أفعال هي خطا، وكانت خطا، وستبقى خطا ..
💢كونك ام ، لايعطيك أي ميزات تحول الاخطاء إلى صواب💢
وكوننا امهات ، لايعني باي شكل من الاشكال أننا لن نقع في الاخطاء، وهذا لاينتقص من امومتنا شئ في حال نعترف بالخطا ونسعى جاهدين لاصلاحه ، وليس نسعى جاهدين لتبريره !!
تبرير الاخطاء ، وتعليقها تحت شماعيه (المصلحة) هو فالحقيقه ليس له أي علاقه بالمصلحه(مصلحة الطفل)
⭐مصلحه الطفل هو ان يعيش مع ام تسعى جاهده ، وتكون مجاهده حرفيا كي لاتخطا في حقه
🖍️من تضربي، هي بالحقيقة انك فقدتي اعصابج، وماعندج أي اسلوب بالتربية وووصلتي لحافه التحمل، واخيرا ضربتي،، هذا فشل في الموقف ، وملكيتي حل حقيقي يسعفك سوى استعمال العنف (الجسدي) وهذا لايجعله (فعل صحيح أو مباح)
🔺الخطأ يبقى خطا .. واسعي لاصلاحه ،
🖍️من تنطي ممه أول يوم، هو استسلام وعدم الرغبه في بذل جهد اضافي (لمصلحة الطفل)
وسهرج أو عدمه مو مبرر أن يلجأ للحليب الصناعي ، مدام عندج قدرة على الرضاعة الطبيعية (وهذا أيضا فشل في هذا الموقف وميخلي فعل صح لمجرد انتي أمه)
🖍️من يباع موبايل وهو 8 أشهر
هذا تهرب من مسوؤلية اللعب واشغال وقت الطفل باشياء تناسب عمره، وتسليم المهمه للجهاز (الموبايل) وهذا فعل مابي أي صالح للطفل
وجود اطفال آخرين يباوعون موبايل، هذا هم خطا وبدل ماتنطي انتي هم جهاز، سحبي الاجهزه منهم وخليهم يلعبون سوه
كونج ام لايعطيك مبرر أن تشمري على الاجهزه بحجه عدم الحرمان!
🖍️من تنطي ممه مثرود بي بسكت ، انتي دتدمرين اسنانه ودتسوين كوراث بتغذيتة ومناعتة ووو
ومو مبرر خاطر ينام زين، رتبي نومته من تكعدي من وقت وتوكلي اكل صحي ..
كونج أمه مو مبرر تخربطين صحته!!
ليش كتبت هذا البوست؟
شفت مقطع فديو لام في امريكا، تقتل طفلها عمره بحدود 8 أو 9 سنوات
تقتله غرقا (تشمره بالبحيره) وتنهزم
وتم تصوير الموقف بكاميرات المراقبه
والاسوا بلغت الشرطه ان الطفل انخطف
وبعد أن لكوا الجثه، وشافوا فديو الجريمه بالكاميرا، وتم اعتقالها
اعترفت وكالت
أي اني قتلته، لان بي توحد
والعالم مكان قاسي عليه !!
دزيته لمكان افضل اله!؟؟!
وبين قوسين (اني أمه واني ادرى بمصلحته) !!!!
الاخطاء … من ابسط خطا إلى آخطر خطا (قتل)
مالها أي مبرر !
الي يسويهن ، هو شخص فقد زمام الامور .. وفقد الحكمة وفقد السيطره على نفسه وكعد يحط قوانين بكيفه من راسه،
وكونج ام… لايعطيك حصانه لارتكاب الاخطاء …
والغاية لاتبرر الوسيلة
يعني حتى لو غاية الفعل صحيح ، مدام وسيلتك خطا، يعني الفعل كله خطا
لذلك اكرر واكول
يا امهات ، الخطأ خطا … لاتبررين ولاتنصيحين بي سواء خطا بسيط أو خطا شنيع
واسعي بكل جهدج وحيلتج حتى تتوقفين عن ارتكاب الاخطاء
قال رسول الله صلى الله عليه وسلم: ((كل بني آدم خطاء وخير الخطائين التوابون)
د.اسماء اسماعيل البدري
