#التربية
تعقيب على البوست الي يتكلم عن #زرع_الثقة
احب اتوسع بي شوية
واتكلم عن تاثير اختلافات ردود فعل الام ال(مستمررررر) للكلام السلبي الموجة للطفل:
⭐1⭐في حال الام جاوبت مباشرة, وضحنا انه الطفل حيتعلم هذا الشي ويكون قوي شخصية ويكون عندة درع ذاتي
🔸واقصد بالدرع الذاتي انه هو مباشرة يصد الكلام السلبي وماينطي مجال ان يمتص الطاقة السلبية، لذلك هو لايتاثر تماما بهذا الكلام لان مباشرة ينطي رسالة واضحه لنفسه وتوكيد انه هو عكس هذا الوصف او انه هو مابي هذا الوصف
(وكيح ومحلو/ لا اني حباب وحلو )
🔸ومن يكبر ، حيكون مستقر وميتاثر بالكلام الي يقال له لان هو عارف قدر نفسه تماما
⭐2⭐في حال الام سكتت، طبعا الطفل حيراقب ، هل هي متفقه مع هذا الكلام السلبي ام لا؟
⬅️وعدم الاتفاق هو اعاده برمجه او اخراج الطاقة السلبية الي توجهت للطفل ،
يعني شنو؟
🔸يعني اكو مثلا ام تسكت لحضه توجية الكلام السلبي، لكن في وقت اخر تبدي تدعم الطفل بكلام ايجابي ، حته يرفع من قيمه نفسه،
يعني اذا يسمع علطول كلام من نمط اسود ومحلو
هي في وقت اخر تكله انت حلو وتخبل
وبالتالي هو حميتص الكلام، لكن حيلكة ملجا او شخص ينطي كلام ايجابي ،
🔸وهذا الشخص اذا ماطور دفاع ذاتي من يكبر، حيبقى بحاجه لشخص يرجع عليه دائما حته ينطي دفعه معنوية (معتمد على الاخرين)
⬅️اما اذا سكتت وغلست وكان شيئا لم يكن ، فهو حيفتهم انه أمه متفقه تماما مع هذا الكلام وحيبدي يحاول يلكه حلول حته يرضيها
مثل ماحجيتلكم سابقا عن قصه الطفل الاسمر، والي لكته امه يحط بودرة على ايديه ويكلها شوفي ماما صرت ابيض وفرحان انه لكه حل لمشكلة التنمر، وبده يغير من ذاته حتى يحصل على القبول والرضا .. وهاي طبعا مصيبة وكارثة
⭐3⭐اما في حال الام اتفقت وي الكلام السلبي ومباشرة كالت اي والله اسود مدري عليمن طالع رغم كلنا نخبل وحلوين 😑
فهي سحقت الامل وسوته رماد ونثرته على راس طفلها وبصمت عليه انه هو بشع ومحلو وشاذ عنهم وللاسف يعني (يا لسوء الحظ!!! مين طلع 😏)
🔸وبالتالي هو اقتنع تماما انه هو شخص مرفوض
وعليه ماحيبذل جهد لتغيير هاي الصوره بقدر ما هو يبدأ يكره نفسه وكره النفس الها هواي اشكال بالتعبير
🔺ممكن يكون حاد الطباع ، كثير البكاء،
🔺ممكن كئيب
🔺ممكن ينعزل
🔺ممكن ياذي نفسه ، ودرجات الاذية تختلف من شخص لشخص،
مثل ما نشرنا مره قصه طفلة مراهقه وصل بيها الحال (تجر شعرها وتشلعه خصل خصل الى ان كرعت تماما) والسبب كان هو تنمر المحيطين بيها ويكولوها سوده، والام صافنه وتكول اي مو بيضه مثل خواتها … لا بارك الله بيج 😑
🔺او يوصل نقطه الانتحار وهاي نشوفها هواي بالمجتمع الغربي ، في فترات المراهقه
بالختام
اذا انتي ماعندج قدره تدافعيلة(بكم كلمة) وهو بعده بالكماط، اتعجب شلون لعد عندج قدره ان تكونين له ام !
وتحية لكل ام تدافع عن طفلها مثل ما تدافع البزونه عن صغارها بكل اريحيه وعفوية وفطرة بدون اي تمييز رغم اختلافاتهم ♥️
د.اسماء اسماعيل البدري
