#التربية
دكتورة… شنو الي اسوي بحيث ما اخلي ابني/بنتي تبجي ابد؟؟
او …
هل لازم منخلي اطفالنا يبجون؟؟
هل من ضمن الامانه انه منخليهم يبجون؟؟
الجواب طبعا حيكون طويل ومفصل ودقيق، لذا ارجو من حضراتكم قراءته بتمعن ودقه ❤️واكو تفاصيل اكثر تلكوها ضمن سلسلة:
#لاتبچي
جزء اليوم :
#المشاعر_الطبيعية
الجزء الاول
1️⃣اولا : من عمر (0-12) شهر +- 3 (يعني معدل زائد ثلاث أشهر ناقص ثلاث أشهر على حسب تطور الطفل )
بالمختصر هو أول سنه بحياة الطفل
هذا العمر يحتاج عنايه فائقه،
بكاءه هو تواصله وياج، لذلك لازم تكونين على استعداد دائم لاجابه رسائل التواصل
جوعان… يبجي…. ترضعي
نعسان .. يبجي … تنومي
محتر….. يبجي … تبردي وتخففين ملابسه
خايف… يبجي …. تحضني وتقريله قران واذكار
ضايج… يبجي … تشيلي (أي تشيلي) وتلعبي وتونسي
يريد يتريع…. يبجي … تشيلي (أي والله تشيلي) وتطبطبيله ويتريع
مريض…يبجي … تودي طبيب (مو عرافه تثقب بطنه وتعلك له خرزه وهالملاعيب)
⭐هذا الكلام وان كان بصيغة الانثى، فالمخاطب هو الأب والام، يعني اذا الأم مشغوله الأب يسد عنها ⭐
ماكو بهذا العمر فد شي اسمه عوفي يبجي 🚫
ماكو بهذا العمر فد شي اسمه ميخالف تنفتح رئته🚫
ماكو بهذا العمر فد شي اسمه لاتشيلي يتعود🚫
ماكو بهذا العمر شي اسمه ربي ولاتطلعين عينه 🚫
ماكو بهذا العمر كملي شغلج وروحيلة 🚫
هذا امانه واذا مو كدها رجاءا من البداية بلاها لاتزوجون اصلا
اما اذا تزوجتي خلاص انتهى كونوا مسؤلين عن عائلتكم (اجى غلط اجى صح اجى قبل وقته اجى وره وكته) كله نفس الشي
مدام اجى منكم فهو جزء منكم ، وهو مسؤليتكم المباشره 👍
2️⃣من عمر سنه إلى عمر سنتان:
هذا العمر تبدين تعلمي الصح من الخطأ
ومن يغلط مو تكولين خل اعاقبه واربي 🚫 خطأ خطأ جسيم
من يغلط تصلحين الخطأ كدامه.. ركزي بهذا العمر على طرق اصلاح الاخطاء
وخلي يرتكب اكبر قدر ممكن من الاخطاء
خل يسكب الماء ،،، ويتعلم من ينسكب لازم يتنشف ،
خل يوسخ ايده ويتعلم وره ماتتوسخ تتنظف
وهكذا كل خطأ يسوي خل يراقب طريقه الاصلاح.. مو يشمر ويخربط ومن ينام تتعزل … لا خلي بحضوره .. مو شرط يوميا،،، بس الفكره انه خل يشاهد عمليه الترتيب
ومن يريد يسوي شي خطا وهو ضمن قوانين ال لا الثلاث ،
ومنعتي وبدأ يبجي .. حاولي تلهي بشي ثاني..
وهذا العمر تبدين تهملين التصرفات السلبية (التربية بالاهمال)
3️⃣من عمر سنتين إلى 3 سنوات
عمر المراهقة الأولى:
الي هو يبدي يتمرد ويعاند ويتقصد العناد خصوصا خصوصا اذا سبق وأن منعتي من هواي أمور بالسنتين الي مضت
لو ماخذ مساحه كبيره بأول سنين ، تخف وتيره العناد بهذا العمر بشكل كبيييييييير جدا
تذكري، فترات المراهقه (الأولى والثانية) هي فترات تعويضيه
هي فترات استرداد الحقوق (كما يصورها له عقله) وفترات استعاده السيطره واثبات النفس ..
لذا لو سبق وأن حصل حقوقه، وسبق أن أثبت نفسه، محتصير فتره عصيبه،
بس تبقى مرحله صعبه،
وعليه من يبدي يعاند ويحاول يفرض نفسه، رخي وشدي، الي بيها مجال رخي، واذا شي غلط خلي هو يصلح الغلط.. ركزي على اصلاح الاخطاء بدلا من تركيز على (منع الخطأ)
واذا رفض تصليح الخطا، وجهي عقوبه من جنس العمل ، حته لو بكى، هنا أي خل يبجي مدام يرفض يصلح غلطه (بمساعدتج طبعا)
مثال: وكع كوب الماء وانسكب .. انطي منديل وانتي منديل.. ونضفوا الارضيه معا … حتى لو بكى، ابقي مصممه على انجاز المهمه أو اقلها مشاهدتك ..
وبنفس الوقت افسحي المجال والكثير من المجال في ممارسة الانشطه تحت اشرافك وفي اماكنها
(اللعب في الماء في الحمام أو الحديقة وليس على السرير)
(استكشاف الطعام على كرسي الطعام وليس على الأريكه ‘القنفه’)
وهكذا
4️⃣عمر 3 سنوات فما فوق:
هذا العمر لازم يكون عنده تصور واضح عن المشاعر،
البكاء، الحزن، العصبيه،الفرح، وغيرها
ويعرف يوجها بشكل صحيح
وهو موضوع البوست كله،
من الاخطاء الجسيمه هي منع الطفل من الشعور بالمشاعر الطبيبعه، ومنعه من تجريب (الحزن)
ومنعه من شعور (الفشل)
تحت ذريعه “خطيه”
ولا ما اريده يبجي..
وتحت فكره لا ميصير اخلي يبجي!
نكمل بالجزء القادم بشكل تفصيلي اكثر أن شاء الله ❤️
مع مودتي 🌷
د.اسماء إسماعيل البدري
