#لاتبچي !
الجزء الخامس
#اسباب_بكاء_الطفل
طبعا موضوع لايمكن حصره ببدايه ونهايه، ساكتب الموضوع على شكل نقاط رؤس اقلام ..
وان شاء الله نستفيض بشرحها قريبا
1️⃣ الطفل حديث الولادة ..
معروف عند الغالبيه اغلب الأسباب هي
🔸 جوع
🔸 عدم راحه وتشمل (محتر.بردان.حفاظه مضايقته)
🔸 الم جسدي (مريض أو غازات أو تجشأ او تسنين أو ملابسه ضيقه)
🔸 نعاس وتعب
🔸 خوف او وحده من العالم الجديد
طبعا كلها واضحه أنه نعالج السبب ويتوقف البكاء
لكن اغلب الناس كلها تطبقها عدا الخوف والوحده !
يعني مثلا تروح العائله للمطبخ.. الهول.. الحديقه.. والطفل يعوفوه بسريره وحده!
والمفروض الشي المنطقي أنه الطفل مدام مستيقظ يحضر جلسات العائله عادي حاله حال بقيه الأفراد.. كلش ماله داعي فكره العزل هاي 🤷
2️⃣بعمر الاستكشاف
يعني من عمر الزحف تقريبا ٧ شهور وفوق
هنا غالبا سبب البكاء بالاضافه الى الأسباب المنطقيه،
هو الملل والتقييد المبالغ وكثره المنع وال لا لا لا🙆♀️
هم واضحه اتوقع ..
يعني الصح المفروض الطفل يتحرك براحته .. 🚼
مو مسوين البيت متحف اللوفر 🗿وكله انتيكات🗽 وزجاجيات والطفل يردوه يكعد صنم لو يكعد جلسه وقار ويتمعن النظر بتلك المزهريات الجميله 😅
المطلوب هو تحويل البيت إلى مكان مناسب لوجود طفل دارج .. كلشي خطر يتأمن.. كلشي قابل للكسر (وغالي عليكم) شيلوه من عين ومتناول الطفل 👍
وكذلك البدء بتقديم انشطه تلامس عمره وقدرته ..
لاتعاملون الطفل مثل ريبوت ..🤖 تحشو اكل وتبدلون حفاظ وتنوموه وبس.. الطفل يحتاج يتعلم ويشتغل ..👍
الشغل مالته باللعب والأنشطة (المفيده) ⛹️🎳
والتعلم هو عن طريق التجربه (بمختلف أنواع التجارب)
ومنهج منتسوري متناول أدق التفاصيل بكيفيه تنميه مهاراته ..
3️⃣بعمر المراهقه الاولى (سنتان إلى ٣ سنوات تقريبا)
هنا البكاء هو محاولات إثبات شخصيته وقدراته ..
منها ماهو تمادي ومنها ماهو من حقه
التمادي سبق وشرحناه
الي هو من حقه لازم تنطي مجال للطفل يمارس استقلاليته..
من خلال اسلوب معيشه كامل
يعني يصب الماء ويشرب..🚰 يحط الاكل بصحنه وياكل 🍱
يغسل ايده واسنانه 😁
يسبح🏊♂️
ينظف
يساهم وياكم كشخص كامل ..
طبعا مع الارشاد البسيط .. وليس وابل النصائح 🚫
من يريد يختار شي انطوه مجال مدام شي ميسبب أذيه👍
اذا هاي طبقتوها الطفل بكاءه يصير قليل جدا جدا جدا
أما إذا
طفل بعمر الزحف كله لا لا نوووو بوووو 🙅
اكعد .. 😡
لاتصعد.. 😡
لاتنزل.. 😠
لاتتحرك…
وخرررر ايدك..
تعالوا شيلووووه.. تعالوا نومووووه..
هاااااي شدتسسسسسووووووووووووووي 😱
وغيرها وغيرها من عبارات الي توصل رساله واضحه للطفل مفادها :
انت شخص مزعج
ووجودك معنا مزعج وغير مريح ..
فهاي كلها تتراكم بداخله ويبدي يعبر عنها بالبكااااء والكثييييير من البكاااااء😭😭
وأما اذا بعمر المراهقة الاولى يقابل الطفل بكلمات مؤلمة وتصغير شأن وإذلال
من نمط
ديلااااااااااااا صااااااارلك ساااااااعه تلبس النعااال حتى هاي مدبرتها 😐
وإني البسك
اني اشربك
اني اوكلك ..
اني اغسلك
اني افرش اسنانك.. اني اني اني ..
واذا حاول يسوي اي شي يقابل بالاستهزاء ..
هو هيييجي يغسلووون ايدهم !!! ترست المغسله صابووووون 😆
بالنتيجه هم حيضل يبجي ويبجي ويتنعوص.. 😭
واخر شي يبزع ويسلم القياده كامله للام ويصير شخص اتكااااالي كسسسسسسوووووول 🙈
وبعدين تجي الام او الأب الحباب ويشكي ويكول ابني بالمدرسه بس كلشي ميدبر .. 😔
ياعني غير انتوا منطيتوه مجال !! 🙃
احنا الكبار ومرات تصدف نختنك ونضوج من مثلا منتفاهم وي عوائلنا ونكعد نبجي.. فما بالك بطفل هو كلامه البكاء … وكل ما يحاول يتواصل وياكم يقابل بالتسفيه ☹️
ملاحظة: اعرف كلش زين الأمهات مشغولات ومضغوطات .. وهذا لايعني أنه نكون مثاليين وأنه ٢٤ ساعه مرتاحين والنا خلك الطفل… طبيعي نزهك ونتعب وتصير أخطاء بالتربيه.. مستحيل اكو تربيه مثاليه.. بس مو التربيه كلها تصير غلط بغلط والصح هو النادر 😅
الملخص: الطفل ميبجي بدون سبب.. السبب موجود.. ابحثوا عنه وحتلكوه .. ومن تصلحوه حتلاحظون مباشره يقل بكاءهم… ويقل ترديدكم لكلمه
#لاتبچي !
اتمنى تكون هاي السلسله ساعدتكم وساعدت اطفالكم ..
وان شاء الله توصلون لحياة هادئه ومريحه ومليئه بالتفاهم والحب مع اطفالكم …
وانتظروني قريبا… ان شاء الله
مع مواضيع شيقه أخرى ..
مودتي 🌷
د.اسماء اسماعيل البدري