#لاتبچي!
#بكاء_الاطفال
الطفل انسان كاااامل المشاعر ناقص التعبير..
يعني شنو؟🧐
يعني عنده كل المشاعر الي نحس بيها..
يخاف،😥
يقلق😟
يحس بالوحده😣
يحس بالملل🙄
يحس بالانكسار😭
يحس بالخذلان😔
يحس بالتهميش😐
يحس بعدم القدره والعجر🥺
يحس بالجوع🤤
بالعطش🥛
بالنعاس😴
بالتعب😩
وووو
ومن اول يوم يجي بيها للدنيا.. 👶
لكن كلها يعبر عنها ب البكاء!😭
لان هاي اللغه الوحيده الي يعرفها ..
كطفل صغير تتعامل اغلب العوائل مع بكاء الطفل بشكل طبيعي ..
الي هي الاستجابه والاحتضان ومحاوله (اكتشاف) أو (تخمين) سبب البكاء ومن ثم تلبيه مطلب الطفل ..❤️
واللهجه الغالبه (خطيه)
يا ديبجي
دشوفي خطيه ديبجي..
ووو غيرها من أساليب التعاطف..🤗
وهذا شي جيد جدا وجميل وهو من الفطره السليمه 👍
لكن بعده مده من يبدي الطفل يتكلم وبشكل (غير متقن) _طبعا العمر يتخلف حسب تطور الطفل لكن كمعدل هو بعمر سنتين ونص_
تتعالى الاصوات المطالبه بعدم البكاء ..🤫
ويصير اول استجابه للبكاء ب
لاتبچي..🤫🤐
هاي الاستجابة خطأ . 🚫
لعد نعوفه يبجي؟ 😑
ببساطه اي.
شلون !!! 😲
اني اكلج شلون
بكاء الطفل ينقسم لنوعين
1️⃣الاول: بكاء التمرد والعصيان والضغط 🤬
حنتناوله بالتفصيل ببوست منفصل تحت هاشتاك
#هو_فرعون_منو_فرعنه
2️⃣الثاني: بكاء التعبير عن مشاعره (اي مشاعر كانت)
سواء عجز أو ملل أو قهر أو انزعاج
لاتكولين له لاتبجي! 🚫
هو ديعبر عن مشاعره بالبچي .. 🤷
ماعنده القدره أنه يجي يكلج ماما اني حاليا محبط لان حاولت اسوي برج من المكعبات لكن المكعبات وكعت وحسيت نفسي صغير وكلشي ما اكدر اسوي وعاجز !! 😆
ماعنده هاي القدره على التعبير..!😅
هاي كلها يحس بيها ويبلش يبجي!😭
الي عليج تسوي تساعدي أنه يتخلص من هاي المشاعر..
وتعلمي يعبر بطريقه اخرى..❤️
شلون؟🧐
تحتضني وتقبلي وتتكلمين عنه .. 🤗🥰
👩_ضجت مدتصير المكعبات مو؟
🧒_ وااااااااااااا اهئ اهئ اهئ
👩_ميخالف حبيبي سهله ..
🧒_واااااااااا اهئ اهئ ييييييي
👩_ان شاء الله على الجايات تكدر تسويها ..
🧒_اهئ اهئ اهئ..
👩_تبوسي مره لخ وتقترحين فد مقترح.. تحب نكوم نلعب بالسيارات؟
🧒_لااااااااا واااااااا ما ارييييد اهئ اهئ
👩_مقترح ثاني تعال نغسل وجهنا .. اذا استجاب هاهيه انتهى
اذا مستجاب وبقى يدفر ويصرخ ويعيط وتمادى اكثر وأكثر..
حافظي على هدوئج قدر الإمكان واسكتي وعوفي
ببساطه اهملي..👍
حيفهم هذا التعبير (حاليا ) المتطرف “ونوبه الصراخ هاي”
محيحصل منها تعاطف.. ولا تبادل حوار.. 🚫
مره على مره حيقل استخدامه الها بشكل كبير..
تذكري تصرفات الطفل كلها عباره عن تجربه ..
واستجابتج هي نتائج هاي التجربه ..👍
زين شنو المانع من أنه من يسوي هاي الهوسه والصراخ ببساطه نكله بس عاااد كافي
لاتبجي ! 😡
المانع سببين ✌️
☝️الاول : انتي كبتي تعبيره عن مشاعره.. وحصرتيها بكلبه.. مثل حجايه انتي ردتي تحجيها وسكتوج عنها..🤐🤫
محتسكتين عنها ! 😆
لان انتي تردين تحجيها .. رح تتحينين اي فرصه مناسبه حته ترجعين تحجيها..😁
نفس الشي من حتكولين له لاتبجي وسكت فعلا.. وره شويه هم حيرجع يبجي ويرجع ينوح كل ربع ساعه ..😩
لان مشاعره متفرغت.. وحتظلين تكولين لاتبجي ..
وحيظل هو يبچي 😆
فاختصري الموضوع وخلي يبجي!
خلي يعبر !
✌️الثاني: اكو امراض نفسيه شديده (اضطرابات شخصيه) تصير سببها هو كتم المشاعر الطبيعيه.. وعدم السماح بالافصاح عنها..
من تصير بشكل مبالغ جدا من قبل المربي.
فلا تساهمين بتكوين شخص مريض نفسي بالمجتمع .. مناقصين والله 😂
الجزء القادم عن سيكولوجية بكاء الطفل .
مودتي 🌷
د.اسماء اسماعيل البدري