#التربية
وحده من الأمور المهمه الي احب انبه الاهل عليها،
الا وهي
لاتعلم طفلك على العبوديه
عن طريق زرع افكار
(نفذ وانت ساكت )
شلون توصل هيج فكره للطفل؟
بهواي طرق
لكن من خلال اختصاصي احب اكتب الي اشوفه من اختلاف تعامل الاهل مع الطفل الي يجي للمراكز الصحيه
للأسف ولا مره صدف أن اجى طفل وسئلني أي سؤال ،
وانما اني جنت اثير التسؤلات عسى ولعل يتجاوب وياي
لكن بدون اي فائده
على العكس نشوف في العيادات الخاصه
يكون الطفل اكثر ثقه بالنفس ويحاول يتحاور وي الطبيب ويستفسر
شنو معنى هذا الكلام ؟
معنى هذا الكلام للأسف هو تاثير البرمجة المسبقة الي يمارسوها الاهل ، يعني الاهل يطلبون من الطفل أن ينفذ أوامر الطبيب بدون أدنى اعتراض ،
كان تكول له : انت كلشي متفتهم وهو طبيب ويفتهم شيكلك سوي وكله أي ولاتحجي زايد حتى نكمل بساع ونرجع
من جانب العائله الي تربي طفلها يكون ذو شخصية قوية، من تودي طفلها للطبيب بالعياده, تكول له اسئله أي شي يخطر ببالك .. هذا طبيب يعرف هواي امور , تعلم منه وناقشه بالي يكوله الك، واحجيله اعراضك ووو
خصم الكلام،
سواء وديت طفلك لمركز صحي أو عيادة خاصه، لاتلقنه ان يكون (بلا رأي)
ولاتزرع الخوف مقدما … من خلال استخدام عباره :
اذا ماسويت كذا (اضربك ابره) وهاي طبعا يرادلها بوست وحد نحجي بي شكد هاي العبارة مسمومة ومؤذية للطفل مرتين، مره وهو سليم ومعافى ومره وهو مريض
من تودي طفلك للطبيب أو لاي مكان
استشعره بأن هو كيان مستقل وخل يعبر عن افكاره ، حتى لو ماتنفذت وحتى لو صار العلاج (غصبا عليه)
بس اقلها عبر عن نفسه
هذا وين يجرنا ؟
يجرنا للانسان الي ينهان ويناخذ حقه منه أو يسوي اشياء هو مامقتنع بيها بس حتى لايثير الغرابه (ويكون حشر مع الناس عيد) وبين قوسين
(مثل العبيد… تساق بالعصا بدون اي اعتراض)
لاتربي طفلك ان يكون عبد
كل الناس تولدهم امهاتهم احراراً
ومحد يصير عبد ، فقط الي ماعندة تقدير لذاته ، وراضي بالذل
د.اسماء اسماعيل البدري
