#التلفزيون_والطفل 📺
الجزء الاول 1️⃣
🚩جنت متوقعة انه صار معلوم لدى كل الأهل أن التلفزيون للطفل باول ١٨ شهر ممنوع تماما بتاتا بدون اي استثناء(يعني اول سنه ونص)
خصوصا لقنوات الاغاني الصاخبه .. (طيور بيبي .. طيور جنة.. كراميش .. الخ )
لكن الي فاجئني باحدى الكروبات سؤال عن شكد تخلين الطفل كدام التلفزيون وشكد وقت.. واكو تعليقات لبعض “الامهات” انها تخلي طفل ابو ٥ أو ٦ شهور (بالحجله) وكدام (التلفزيون) طووووووووول النهار !! وبس وكت للنوم تشيله عنها!!!!!!
وتنشر بهذا الفعل بكل اريحه وتكول والله مريحني يتفرج وإني براحتي اشتغل!! لا صدك والله 🤯🤯
وكاتبليها تره موزين .. تكول لا عادي هو يحبها 😆🤚
محكول اذا باع حيصير توحد. 🙅
ولا اكلج حيصير بي فرط نشاط.فرط حركه🤷
هاي تشخيصات مو بهاي السهوله تنحط ولامن العلميه أنه نكول مجرد طفل باع تلفزيون حيصير بي توحد . 🚫
زين لعد شيصير؟ ليش ممنوعه؟ 🤔
هنا موضوعنا
الطفل باول سنه 1️⃣ يمر بمراحل هواايه ومهمه جدا
باول سنه يكول اول كلمه🗣️
يتعلم يكلب.. يكعد..يزحف.. يحبي.. يمشي 🚶
يتعلم يلزم.. يشيل
يتعلم العلاقات.. هذا بابا 🧔هاي ماما👩🦱.. هاي بيبي👵.. هذا حباب🤗، هذا احبه يلعبني🥰.. هذا ما احبه يضوجني،😒
يتعلم ياكل.. يشرب..
بالسنة الثانيه تقريبا 2️⃣
يلبس ينزع..
يركض يكمز ،
يسولف ويكون مخزون كلمات ..
ويستمر التطور الطبيعي الي رب العالمين خلق الطفل بي..
زين اول سنه حتى يتعلم كل هذني شوكت وشلون؟🤔
⏪نجي على شوكت..
الطفل اول ٦ شهور تقريبا ينام ١٢ ساعه بليل ونص او ربع النهار “كمعدل”
شيبقى؟ يبقى وقت قصير كلش.. ⏳
هذا الوقت هو الي رح يتعلم بي.. تجين انتي يافلانه وتحطي كبال التلفزيون وتربطي بالحجله !!! شوكت بالخير يتعلم؟؟؟ 🤦
⏪اما الشلون يتعلم؟
بالتدريب والتكرار..
يعني:
🚩 حتى يمشي لازم يزحف..
🔸إذن التدريب هو الزحف الي حيقوي رجليه وأيديه..
🔸والتكرار هو يبقى يزحف ويزحف مو مره ومرتين لا.. حسب كل طفل هو يشوف هذا المقدار كافي اله ويستعد أنه ينتقل للخطوه التاليه(الوقوف ثم المشي)
زين اذا انتي رابطته بحجله لو كرسي وكدام التلفزيون شلون حتدرب؟؟؟؟ 🙄
🚩علمود يحجي 💬🗣️
🔸لازم يشوف 👀حلك بابا وماما👄 من يحجون شلون يتحرك وشلون تصدر الكلمات وشنو صوتها..(هذا التدريب)
🔸والتكرار من الكلمه يشوفها اكثر من مره حتنطبع بباله وهو بكيفه وحسب قدرته حيكولها ،
زين اذا انتي نادر يشوفج تحجين وياه مين حيتعلم؟؟ من ” يا بابا سنوني واوا”؟؟؟ 😕
🚩علمود يعرف ياكل ويشرب 🍜
🔸لازم يلزم الاكل ويتعرف عليه ويجعصه ويمرده ويشمه ويحطه ع خده وبطنه وشعره وبالاخير يقرر يحطه بحلكه..(هذا التدريب)
🔸والتكرار يبقى يعيد ويزيد وبكل مره هالشكل إلى أن يقرر أنه تعرف على الطعام بشكل كافي ويفهم هذا ينحط للفم مباشره وفقط للفم..👍
اذا انتي متخلي يلزمه اصلا وتصنمي كبال التلفزيون وتسوي ريبوت يفتح حلكه ويسد تجين تشكين مايكل وميعرف ياكل إلا كبال التلفزيون؟! 📺
هو انتي انطيتي فرصه اصلا! مين يتعلم ؟ 🙁
🖍️المختصر :
الي يهمها طفلها والي حاطه الله بين عيونها تره ميصير حرام عليج كفر بحق طفل عمره بالاشهر تحطي كبال تلفزيون بالساااااعاااات هالشي غلط ❌
غلط ❌
غلط❌
وآثاره حتطلع بعدين.. وتعالي عود تلاحكي من طبيب لطبيب
‼️شنو طفل عمره سنتين مايعرف يمشي!!
‼️شنو طفل عمره سنتين وميكول بس ماما وبابا؟؟
‼️شنو طفل يدخل مدرسه ميعرف يلزم قلم؟؟!🖊️
‼️شنو طفل عمره ٣ سنوات ميعرف يتواصل وميعرف يكول اريد اكل اريد مي اريد العب !! 😐
⚫هذا الحجي لاطفال طبيعيين يولدون طبيعيين كلشي مابيهم لا متلازمات ولا خلل بالنمو.. بس الخلل باهلهم الي شمروهم ..
⚫والمصيبة الأكبر والأدهى والأمر اذا اصلا الطفل عنده مشكله نمو ، بدل ميساعدوه يدمروه بزيادة 💔
#يتبع ..
د.اسماء اسماعيل البدري
