الثقه بالنفس
موضوع دائما اريد احجيلكم عنه
اللي هو موضوع الثقه بالنفس
انتوا تعرفون انه الثقه بالنفس جدا ضروريه للطفل و تخليه يعرف يتصرف بالمستقبل القريب و البعيد
تخليهم مستعدين للحياه و لصعوبتها سواء ولد او بنات
هذه ١٠ نقاط تساعد على تعزيز الثقه بالنفس
١. عزز ثقتك بنفسك انت
حب نفسك
اكو مقوله تكول ( انت لا تستطيع أن تعطي طفلك ما لا تمتلكه)
احجي وياه عن الحياه و صعوبتها و شون انت تتعب حتى تشتريله اللي يريده
٢. لا تصيرين متحكمه صيري مدربه او مدرب
المرحله العمريه اللي كنت تتحكم بيه راحت
علمه أكثر
علمه يبني عماره مكعبات ببساطه
شجعه يمشي
تعامل وياه كمدرب
و هذا طبعا يجبرك تتحكم بغضبك
٣. خلي محور حياتك هو ( التشجيع)
دائما شجعه و خلي متحفز دائما
دائما خلي يكرر نجاحاته
خلي يعزز ثقته بنفسه
٤. كدام الآخرين أبدا لا تذمه و تقلل من شأنه
امدحه
احجي بايجابيه عنه
٥. انطيه المسؤوليه و طبعا بالمعقول و حسب عمره
خليه يركب البايسكل
و من تروح وياه للمحل خليه يشتري
٦. المدح المدح المدح
المدح بكلمات قويه مثل( خوش شغل) و ( عاشت ايدك) كلمات كبيره كانما هو كبير راح تزيد من أفعاله الحلوه
٧. من يعبر عن غضبه و انفعالاته و بجيه لا تلومه و تكوله عيب
خلي يعبر عن نفسه
اساله شنو اللي اذاه
شنو اللي ما عجبه
٨. حدد الأهداف مثلا من تصير ٤ سنين راح تلبس وحدك
و من تصير ٣ سنين راح تتعلم للتواليت
و من تصير ٥ سنين نسجل بالروضه
و هكذا
من راح يحققها راح يحس بالنصر
٩. لا تساعده
كلنا نتمنى انه طفلنا ما يوكع و ما يتاذى و ما يصير بيه شي
بس بالنهايه ماكو طفل ما يوكع
من يوكع خليه ينهض وحده
خليه يتحدى الالم و الوكعه
اعرف الموضوع يبدو قاسي
بس ما تتخيلون شكد مفيد كشخصيه طفل مستقله
١٠. من يجيك يركضلك و عنده مشكله مو تنطيه حلها كوليله خل نفكر شون نحلها
لا تنطيه كل الاجوبه
تناقشي وياه
و اسألي رأيه
د. سيف سمير البياتي اخصائي طب الاطفال
