السكر و السمنه و النوع الاول و النوع الثاني !
قد يبدو العنوان ككلمات متقاطعه
بس العنوان مجرد ينطينا فكره عن السكر و انواعه و علاقه السمنه بالسكر
نجي نبدي من البدايه كلش
شون يصير السكر
السكر يصير من اكو خلل بالانسولين
الانسولين هو الهرمون اللي يرتب السكر و يخليه ما يصعد
الخلل وين يصير ؟
الخلل اما الانسولين ما ينتج و قليل او معدوم و هذا يسموه نوع اول اللي هو سكر الاطفال
او الانسولين إنتاجه زين بس الجسم يقاوم الانسولين فما يشتغل الانسولين
و هذا يسموه النوع الثاني من السكر
ليش يقاوم الانسولين؟
بسبب السمنه
و شنو سبب السمنه المشروبات الغازيه و العصير الطبيعي و الافراط بيه و الكيك و كل الحلويات اللي بيها سكريات
قبل ايام بايام الحصار مثلا و بدايه الاحتلال ما كانت السمنه منتشره فما كنا نشوف نوع ثاني بالاطفال
حاليا عدنا و بسبب زياده حالات السمنه بدينا نشوف سكر النوع الثاني عند المراهقين و الاطفال
الكارثه وين؟
الكارثه من تكول انه هذا الشي مو صحي
يجيك الرد : دكتور هو منينله سمن هذا نفخ
او دكتور هو ما ياكل بس عايش ع الببسي
او دكتور مو هو ما يقبل الا يشرب عصير
احاول احيانا اتجاهل اتناسى اكول ما اكتب خصوصا بعد ما اقرا تعليقات مسيئة لشخصي بس ما اكدر اسكت و الا ما كنت صرت طبيب
اقسم بالله حالات سمنة و الام دا تنطيهن مشهي و الضغط كان صاعد و السكر بادي يصعد
ما اعرف احنا وين رايحين
د. سيف سمير البياتي اخصائي طب الاطفال
