الكمادات بارده لو فاتره؟
الماء بارد اللي اغسل للطفل بيه من يصخن بارد لو فاتر ؟
الجواب: قيس الامور على نفسك من انت حرارتك مرتفعه تقبل احد يذب عليك ماء بارد؟
خفض الحراره هو لجعل الطفل يشعر بتحسن لا اكثر
مو حتى نزعجه مثل ما واحد يكعدك من النوم برشه ماء بارد
لذلك نراجع الاساسيات
تبريد الجسم يكون بالطرق التاليه
1. الكمادات بالمسح فقط و استخدام ماء فاتر
2. غسل الطفل كاملا و ما اعرف مصدر الاشاعه انه الطفل لازم ما ينغسل راسه و ليش و غسل الطفل يكون بالماء الفاتر المريح للطفل
3. لصقات الحراره ما تفيد و لا الها اساس علمي و مال محروق لا اكثر
4. الكحول سام و ممنوع وضعه لاغراض التبريد
5. اهلنا اللي ساكنين خارج العراق يتململون من الاطباء خارج البلد يكولون شنكوللهم يكولونا اشربوا مي هوايه
هم صح و احنا خطا
اي فعلا شرب الماء ضروري و بكثره في حالات الحراره و السعال و الاسهال و بقيه الامراض
اذا الطفل ما راغب للماء نكدر نخفف العصير بالماء حتى يشرب ماء اكثر
6. جو الغرفه يكون مريح للطفل بحيث ما يكون الطفل يرتجف او منزعج
7. الحاله الوحيده تقريبا اللي نكول بيها للطفل اكعد لا تتحرك هي الحراره
8. لا ملابس ثقيله و لا اغطيه كثيره و بلا نظريه خليه يعرك هسه تفكه الصخونه
الصخونه تفكه لما تخففين ملابسه
اذا حس بالبرد او كام يرجف اغطيه غطاء خفيف مو ابالغ
9. ممكن صرف العلاج اللي هو الباريستول بمختلف تسمياته مثل البندول و الادول و الباريستول و الانتي بايرول حسب جرع معروفه و مثبته ببوستات سابقه مع التحذير من فرط الجرعه كون الباريستول يؤثر على الكبد سلبيا
د. سيف سمير البياتي اخصائي طب الاطفال
