الكمامة كلاكيت عاشر لقطة
⭕ ناس صارت تتساهل بالكمامة و اني منكم و حتى زملاء اطباء مسهليها و عايفين الموضوع و كانما كورونا راحت و الغريب انه اني و انتوا اكيد سامعين او شايفين مصاب بكورونا و يعرفون يعني شنو كورونا و شنو شدتها
⭕ تناسي الكمامه بالبدايه كان لاسباب ماديه بس بعد ما صارت الكمامه سعرها مناسب اكثر طلعوا حجج اكثر في حين السبب الرئيسي لعدم الالتزام بالكمامة لازال مجهولا
⭕ وحده من اهم الادعاءات لعدم لبس الكمامة هو :
يمعود سهلها كلنا راح يصير بينا كورونا !
الدليل انه مو الا يصير بيك كورونا انه كورونا صارله ٨ اشهر و لحد الان ما صار بيك كورونا !
اسوء وباء صاب البشريه كدر يصيب ٦٠ الى ٧٠ بالميه من الناس و هم ما صاب الناس كلها
و اذا توفر لقاح بعد اشهر يعني اكيد ما يلحك يصيب الكل لذلك انسى هذا العذر لان ما راح يصيب الكل
⭕ سبب غير منطقي اخر يدعون بيه انه الفايروس صابنا كلنا في وقت ما
و هذا خطا كبير و نشرت بحث اسباني انه رغم الانتشار الكبير للكورونا انه ما صاب الا 5 بالميه من السكان بعد
⭕ الادعاء الثالث انه الكمامة قابل شراح تسوي ؟
الكمامه صح اعترفلكم تفيد اكثر لو المصاب يلبسها
بس الكمامه راح تقلل الحمل الفايروسي
و هذا يعني ان عدد الفايروسات الداخله لجسمك تكون اقل و بالتالي تسهل على جهازك المناعي القضاء عليه
انتوا شايفين شكد وفيات بالاطباء بالعراق و حول العالم اكثر من غير فئات؟
لان نتعرض للفايروس بعدد اكبر و بالتالي يصير الالتهاب اشد و اقوى
⭕ الفايروس صح في 90 بالميه ما يحتاج علاج
بس الاستهانه بيه راح تودينا للتهلكه
و تخوف اهلك و ناسك عليك
خليك حذر و اخذ بالاسباب و البس كمامتك و الله يحفظك
د. سيف سمير البياتي اخصائي طب الاطفال
