#المثالية
#التربية
التربيه صعبه … والامومه صعبه جدا 😣
نمر بفترات نتعب كلش.. ونمل .. ونضوج… 😔
ومن نقرأ ونحاول نتعلم نكتشف أخطائنا ..
ونضوج بالزايد🤦
احب اكلكم شغله..
ماكو تربيه مثاليه …❌
ريحي بالج… 😅
كلنا نغلط..
وكلنا نجفص بتربيه اولادنا مهما حرصنا أنه منغلط… 🤭
زين ليش؟ 🧐
لان ببساطه التربيه المثاليه حتؤدي الى انسان مثالي.👤
هذا الشي ماله وجود…
الانسان هو عباره عن أخطاء وتصليح الاخطاء … 💫
لو صار كله صح جان صار اسمه ملاك …😇
مجان صار اسمه انسان 👤
يعني اخطائج بالتربيه هي طبيعيه جدا.. 🙃
لان انتي بشر والي دتربي أيضا بشر .. 😅
واحب اطمنج اكثر.. 🤗
لو في حال من الأحوال “نفرض نظرية” كدرتي توصلين إلى طريقه أنه متغلطين ابد ابد بالتربيه .. وتوقعتي أنه هذا الشي هو صح.. ابشرج هذا شي جدا غلط 😂💔
ليش؟😧
◀️لان دتخلقين انسان ميعرف معنى الخطأ..
◀️ميعرف شلون يصلح الخطأ..
◀️من حيطلع من هاي البيئه المثاليه الي تسمى “بيئه معقمة” حينصدم صدمه عمره من يختلط بالمجتمع .. لان المجتمع مو مثالي!
⏪مثل شخص عاش بفقاعة وفجأة طكت ووكع ع الكاع …
راسا حيتمرض وحينكسر بشده…
ومحيكدر يواجه اي شي …
حيصير شخص هشش..
⚠️هسه تكولين لعد عليش دنقرا ونصلح خوب نبقى غلط بغلط..🤷
هنا اكلج لا ميصير …❌
قال رسول الله صلى الله عليه وسلم : “كل بني آدم خطاء, وخير الخطّائين التوابون”
يعني كلنا نغلط …
بس لازم لازم نبقى نصلح من الغلط..
وهيج حنرتقي بنفسنا ..
ويوم عن يوم نكون احسن واحسن وافضل .. ❤️
ومن نغلط ببساطه نعترف ونصلح .. 👍
وهنا هدف البوستات مالتي
رجاءا رجاءا
لاتكابرون على الاخطاء 😣
هواي اشوف كومنتات للاسف اكول سخيفه وان تدل فهي تدل على سذاجه كاتبها وضحاله تفكيره ،
من إنماط:
🔻”شخبصتونا ابني شبع كتل شوفوه هسه يخبل يحلفون برأسه”❗
🔻”شدعوة هالتعقيد شبيها الممه … شو اني ظليت اشربها لل٦ سنوات وهسه اني عالمة فضاء وعندي درزن جهال وسنوني ليلو “❗
🔻”شبيها الحجلة اصلا بنتي كامت تركض ركض بعمر ٧ شهور وهي من ٣ شهور بالحجله ” 😆✋
وغيرها وغيرها
الي يكتب هيج هذا لايريد يعترف بغلطه ولا يريد يصلحه والاسوا يعلم عليه وينشره بكل صلافه ووقاحه … 🙄
⏪والمصيبه الضحيه هم اطفال لا حول ولا قوه
بالله لو جانت خلطه تبيض الركب والاكواع لمده ٣ ثواني ونشروها وراحت كومه بنات تجرب ,,
عادي كيفها هي انسان جبير وواعي واذا صدكت أو لا شي راجع الها محيصير ضرر على شخص ثاني .. هي جابته لنفسها..
⚠️اما نشر افكار تخص التربيه والأطفال وكلها عباره عن خزعبلات وخرابيط واذييييه لا والله
⚠️لا والف لا ❌❌❌
ححاربها وابقى احاربها حتى لو زعلوا …
اني هدفي اكبر واسمى من أن اكعد ارضي اي شخص يكابر ..
وبدل ميكول اي والله زين نبهتيني يكول
“هي شمفهمها عود صايره فيلسوف براسنا ”
رغم كل الي اكتبه مقتبس من علماء وانبياء وصالحين ، ومن القران الكريم
كل هذولي (استغفر الله ) تطلعهم ميفتهمون بس هي الي تفتهم على اعتبار هي من سلاله المنزهين!
ختاما …
اخذوا المعنى من البوست..
اخذوا الفائده..
وابقوا حاولوا تصلحون الاخطاء،
ولاتظلون وره الأشخاص الي تلمع الكم الأخطاء بس في سبيل تحصل رضاكم وتعاطفكم وارضاء أنفسهم وتبرير لفشلهم و (كم لايك كومنت)😏
واكو مثل يكول امشي ورة الي يبجيگ ولاتمشي ورة الي يضحكك
لان الي ديبجيك صادق وياك ومكاعد يجاملك …
لان عنده رساله تريدها توصل ..💌
⏪ يقول الإمام علي إبن أبي طالب: “لا تستوحشوا طريق الحق لقلة سالكيه”
يعني مو لان كل الناس تسوي غلط معناها صار صح!!
لا ❌
الغلط يبقى غلط حتى لو الكل تسوي
والصح يبقى صح حتى لو القله القليله الي دتسوي✔️
واكيد الشي الصحيح اصعب واشق ويحتاج جهد أعلى من الحلول الترقيعيه،
من أمثال “ضربي راشدي فري رأسه وهو ينعدل”🙃
أما صاحبه البيج الي هاجمتني باسمي وكايلة “هي منيه هاي دكتوره اسماء”
فما ارد عليج عزيزتي .. لان انتي عود جنتي دتحجين ضد التشهير، عندج عيب نشهر باحد (رغم مجبت اسم اي شخص) بس بالمقابل عادي تشهرين باسمي 😂😅
احب اكلج اني ولا احد
واخر همي اصير فد شخص معروف
هدفي نشر التوعيه فقط
الي يريد ينتقدني خل ينتقد كلامي … وليس شخصي، لان هاي بضاعة الي ماعنده بضاعة 🙃
مودتي 🌷
د.اسماء اسماعيل البدري
