الملخص لتطور اول سنة
لا ننسى ان اول سنة هي اهم سنة لتطور طفلك
اللي كملوا اول سنة راجعوا ويايه ال ٣٤ نقطه
1. اول ما يجي للدنيا راح يبجي يسموها صرخه الولاده
2. يبدي يفز من اقل صوت و هيجي يكون دا يسمع
3. من يجي الضوء بعينه يسدها و هيجي نكون تقريبا فحصنا النظر
4. اذا نومتي ابن يوم او يومين على بطنه راح يدور راسه يمين او يسار ليحمي مجراه التنفسي و هذا منعكس طبيعي
5. بعمر شهر اذا نام على بطنه راح يرفع رقبته فقط
6. بعمر شهرين يرفع راسه و شويه من صدره اذا نام على بطنه
7. بعمر ٣ اشهر يرفع راسه و صدره اذا نام على بطنه
8. اول ما يجي للدنيا ما يشوف بعيد كل اللي يشوفه تقريبا ٢٥ سنتمتر عنه
9. بعمر شهر يتابعك بالنظر الى زاويه ٩٠
10. بعمر ٣ اشهر يتابعك الى زاويه 180
11. جدا يحبون الوجوه و بالاخص الوجوه الدائريه و لهذا تشوفوهم يحبون الناس اللي عدهم خدود اكثر
12. الابتسامه التفاعليه هي اول ضحكه يتفاعل بيها وياك و هاي تصير من عمر ٤٠ يوم الى عمر شهرين ( ادري راح تكولين ضحكلي ابني من عمر ساعه عكس العلم و اني راح اسوي روحي مصدك)
13. بعمر ٤ اشهر يسند راسه و ممكن يتاخر الى ٥ اشهر
14. المناغاه تبدي بعمر الشهرين و ممكن تتاخر الى عمر ٣ اشهر ( ادري انت طفلك يناغي من عمر ساعه عكس العلم و هم راح اسوي روحي مصدك)
15. ايده دائمه مصمومه و هذا عادي و يفتحها بحوالي ٤ اشهر يعني هذا العادي مو بخيل
16. بعمر ٤ الى ٥ اشهر يضحك بصوت واضح
17. يعرف اسمه بعمر ٥ اشهر لهذا نكول لا تكثرون الاسماء عليه توتو و نونو و ابو راس و مدري منو و هو الطفل اسمه كيان ! صيحوه باسمه فقط حتى يعرفه
18. يلعب بيديه الاثنين و يلزمهن بعمر ٣ اشهر الى ٣.٥ شهر
19. بعمر ٦ اشهر او ممكن قبلها يلزم الشغلات الكبار مثل المميه او الكوب و هنا الكثير من الامهات يكدرون يعلموه على الكوب
20. الطفل باول سنتين لا يمناوي و لا يسراوي و ما يتحدد الا بعد ال ٣ سنين ( ادري ابنك يمناوي من اول يوم عكس الواقع و هم راح اكولك اوكي )
21. يبدي يكعد و ظهره مقوس بعمر ٧ اشهر
22. يبدي يكعد مستقر بعمر ٩ اشهر
23. فوك ٦ اشهر كلشي يلزمه يوديه لفمه و هذا العادي
24. بعمر ٦ اشهر يبدي يستغرب و من العادي انه يستغرب
25. توتر الفراق يبدي بعمر ٩ اشهر يعني يبدي يشتاقلك من هذا العمر قبلها مو كلش تفرق وياه
26. بعمر ٩ اشهر يلزم الاشياء الصغيره و يبدي يستخدم الإبهام
27. التقلب من البطن على الظهر يصير بعمر ٦ اشهر و بالعكس من عمر ٤ اشهر
28. قريتي النقطه الفوك؟ يعني ما ينترك الطفل وحده على سريرك من عمر ٤ اشهر لان يوكع
29. الزحف ممكن باي وقت من ٧ الى ١١ شهر
30. المشي ممكن يكون بعمر ٩ الى ١٨ شهر و دائما البنات بعمر سنه و الولد بعمر سنه و ٣ اشهر ( ادري عمتك تكولك جهالها يمشون بال ٦ اشهر هالمره انت سوي روحك مصدكه)
31. مقاطع الكلمات مثل دااا و باااا تبدي ب ٩ اشهر و هذه لا تعني لا بابا و لا دادا
32. بعمر 10 اشهر يعرف يعني شنو لا انه ما مقبول هذا التصرف
33. بعمر سنه يبدي يشمر كلشي بيده
34. بعمر سنة يكول كلمه وحده مثل بابا او دادا
د. سيف سمير البياتي اخصائي طب الاطفال
هذه الارقام للاطفال مكتملي النمو
الاطفال اللي ينولدون قبل الاوان يتاخرون ضيفوا الوقت اللازم لاكمالهم العمر الرحمي
