الممتون او المخلوع او المملوع او الملوي او الممصوع
و الفعل هو : انمتن او انخلع او انملع او انلوى
نفس الكلمات
لحاله يعتقد الاهل ان الطفل تعرض لسحبه او حمل بطريقه خطا
و بالتالي صار عند الطفل تشنج عضلي
او احيانا يحمله طفل بطريقه ما و يكولون انملع او انمتن
كلمات متعدده تؤدي الى نتيجه وحده
انه الطفل يبجي بطريقه هستيريه
المتن يختلف علاجه من محافظه الى اخرى و من بلاد الى اخرى
قسم يسوون مساج
و قسم يجيبون عجينه و يخلون ببها اعشاب و يخلوها بظهر الطفل او اي مكان يخلي الطفل يسكت
قسم يقرون قران
و قسم يكمطون بطريقه عجيبه
هذا عن الطب الشعبي
بالطب الحقيقي
ماكو تفسير لهذه الحاله
ممكن الطفل يسحب نفسه من كثر البكاء الناتج عن المغص و يقلص ظهره و بالتالي الم اكبر
او ممكن يكون ببساطه مغص مو اكثر
احيانا التهاب اذن
او التهاب مسالك بوليه
.
.
زين ليش يصيرون زينين بعد العلاج التقليدي ؟؟
ببساطه لان الطفل محتاج للمساج
المساج اصلا واحد من خطوط علاج المغص و لراحه الطفل
ممكن انت مغطيه الطفل زايد و بعد ما انفتح ارتاح
.
.
طيب الله ينور عليك شنو اسوي اذا طفلي بجى على غفله و بين قوسين انملع او انمتن لان ماكو هيجي شي بالطب ؟
ببساطه
احجي ويه طفلك
قللي الملابس
فكي الكماط او غيري طريقه الربط الى طريقه اكثر راحه
انطي قطرات الغازات
بردي الجو
و جربي المساج للطفل
استشيري طبيبك اذا استمر الموضوع
تذكري المنشور عن قمه المغص من ٤٠ الى ٦٠ يوم لللي اسمها purple
اللي الطفل يصير بيها ازرك من البجي
د. سيف سمير البياتي
اخصائي طب الاطفال
