انتوا تعرفون ان كل تصرف تتصرفه ويه أطفالك راح ينعكس عليهم بالمستقبل
هذه مجموعه من الأفكار اللي تخلي مخ اطفالكم يتنور و يصير اذكى
و خصوصا بالأعمار من ٦ اشهر إلى ٣ سنين
١. الموسيقى
الموسيقى الها أثر ساحر على تطور ابنك او بنتك و اكيد هي الموسيقى الهادئة
٢. احجي ويه طفلك
انت تعرف انه من تحجي وياه راح تربيه على الصوت و اللهجة و الأسلوب و حتى الأفعال المضارعه و الأمر
٣. بعمر السنه راح يبدي من تغادر ما يسمى بتوتر الفراق
Separation anxiety
يعني يبدي يبجي من تروح و يخاف
هذا شي طبيعي جدا
احذر من انه تتخبى و ترحل هذا راح يزيد توتره أكثر بالمره الجايه
كل اللي عليك انه تكون تضحك من ترحل و تغادر و انت سعيد
٤. بعمر السنه علمه أكثر
شوفه الكتب و الرسوم و فهمه هذا شنو بالدفتر مرسوم طبعا الكتب اللي كلتلكم عليها و نزلتلكم الصفحه مالتهم رهيبه بهذا المحتوى اللي اقصده
٥. علمه الكلمات الجديده و بالبدايه كولها مقاطع با با او ما ما
٦. احلى لعبه عدهم بعمر ال ١٠ اشهر إلى سنه هي الختيله او الختيلان
جيب لعابته الصغيره و ضمها تحت البطانيه و اظهرها
٧. اقره لطفلك: طفلك يحب القراءه بنفس الكتاب مرارا و مرارا
يحب انه عنده خبره بهذا الكتاب
طبعا اريد تعرف انه مو الا تقرا و إنما تخترع قصه حسب الصور ويه ما تاشر ع الصور
٨. صحيح يحبون التكرار بس لازم تسوي أشياء جديده كل فتره مثل السفر لمكان بعيد او تجربه واسطه نقل جديده
٩. ارجع للغنا و الموسيقى
غني معاهم و ارقص وياهم و سمعهم الأغاني اللي يحبوها
١٠. لعبه الاصابع حلوه و ممتعه و هي أن تلبس الاصبع لعابه و تحجي وياه او تسوي خيال بالضوء باصابع ايدك
او مثلا اغنيه
Five little monkeys
و شون الاصابع تتناقص شويه شويه
11. الاشاره باي باي و البوسه اللي يشمرها من الأشياء اللي كلش تحفز التواصل الاجتماعي مع الآخرين
١٢. المكعبات و هنا أعتب كثيرا على الأهل اللي ما يعلمون اولادهم على المكعبات
حتى لو ما يعرف شون يسفطهم
مجرد انه يخليهم و يتلمسهم كلش كافي
و شويه شويه يتعلم
١٣. خليه يمشي و يركض و يصعد درج طبعا باشرافك
بس اشوف بعض الأهل ما يخلون طفلهم يتحرك و هذا شي ما يحفز الطفل أبدا
١٤. علمه على لبس ملابسه و طبعا اكيد شويه شويه بعمر ٣ سنوات يادوب يساعدك باللبس
١٥. الاب : دورك مهم و مهم جدا و أكثر من مره نوهت انه يتعلمون الحجي من الاب أكثر من الام خصوصا اذا يطلع بره
و تحجون وياهم
احرص على قضاء وقت مع أطفالك
١٦. الالوان: انقهر و انفعل جدا من اشوف اطفال اعمارهم من اربع إلى ٥ سنين ما يعرفون الألوان
و من اسالهم هذا يا لون
تجاوب الام و الله دكتور ما معلمته !!!!
التربيه مو بس حليب و حفاظات
التربيه إعداد شخص جيد للمجتمع
متعلم مثقف متربي
تحياتي الكم
د. سيف سمير البياتي اخصائي طب الاطفال
