انت مو تكول لا تضربون و لا تاذون الاطفال لان هذا يأثر على نفسيتهم ؟
لعد شون نربي ؟
شون نعاقب ؟
❤اول شي و اهم شي و دير بالك تنساه
دير بالك تعاقب طفلك على شي انت تسويه
يعني لا تعاقب طفلك لان كذب عليك و انت كذبت عليه !
او لا تعاقب المراهق لان يدخن جكاير و انت تدخن !
لا تعاقبه على صوته العالي و انت صوتك عالي !
تذكر دائما القاعده رقم واحد و خلي بالك من تصرفاتك
❤ العقاب لا يكون على كل شيء و اي شيء
يعني لا تحاسب على النفس
و اكو كم شغله تافهه و سطحيه عبريها شويه
بين قوسين درب التغليس بس انطي ملاحظه و بس
❤ ثالثا العقاب لازم يكون لحظي و الآن وقت وقوع الخطأ
ماكو شي اسمه دا اجمعلك و راها تنفجرين بوجهه
هو اصلا راح ينسى ليش تعاقب و ما يفتهم اصلا شنو الموضوع و لا راح يبطله
❤ الخطأ هو الخطأ
يعني ماكو مسامحه مره و مره لا اكو عقاب
يعني ابنك عاقبتيه على فلان موضوع و مره ثانيه كررها مو ما تعاقبيه و الا راح يكول هاي شنو الموضوع !
اذا ما عاجبك تعاقبيه سوي نفسك ما شفتيه
❤ خلي العقاب اله علاقه بالخطأ
مثلا كسر اللعبه يعني ماكو لعبه ثاني
فشلك او كان جدا مشاكس بزيارة جيرانك فيكون محروم من الطلعه وياك ثاني
و هكذا
خلي الجزاء من جنس العمل
❤ لا للتهديد بدون تنفيذ
يعني راح احرمك من المصروف
او احرمك من التلفزيون
و الطفل ما محروم منها
مره على مره يعرف ان التهديدات لا تعني شيئا و راح تخليه يستخف بيها
❤ لا للتخويف من جماعه اكسر عظامك
اذبحك
اموتك
انت دا تربيه مو فلم رعب
❤ الكلام يكون واضح و صريح
يعني مو و الله اذا ما جمعت العابك راح اشوفك نجوم الظهر
لان هو ما يعرف يعني شنو نجوم الظهر و لا اني اعرف
يعني تكوليله اذا ما جمعت العابك راح اضمها لمده اسبوع منك
❤ ماكو عقوبه كدام الاخر
يعني مو تكولين لاقاربك كدام طفلك انه الطفل معاقب
حتى لو جد الطفل
علاقتك بطفلك تبقى ضمن الدار و مو قصدك بالعقاب انه تهينين طفلك او تحقره
❤ اذا اردت ان تطاع فامر بالمستطاع
يعني لا يكلف الله نفسا إلا وسعها
خلي طلباتك ضمن المقدر و اللي تتصور انه طفلك يكدرله بالأخص بخصوص الدراسه لان مو كل الاطفال عقل واحد و مستوى ذكاء واحد
❤ الاب الغالي ابدا لا تكسر عقاب زوجتك او انت الأم ابدا لا تكسرين عقاب زوجك حتى لو اي واحد منكم غير مقتنع بالعقوبه
تناقشوا بعيدا عن الطفل
❤ اهم شي خليتها اخر شي
العقاب لازم يجي بعد التوجيه و الشرح و الإقناع و ان تكون اولا مثالا جيدا لطفلك
العبوا وياهم
قربوهم منكم
و تكلموا وياهم
امدحوهم لو سووا شغله صح
تذكر دائما عمر الضرب ما يفيد و لا يربي
و تذكر دائما بالأخص الاب أن تكون صارما مو قاسي
دمتم بود
د. سيف سمير البياتي اخصائي طب الاطفال
from د. سيف سمير البياتي