اول اسبوع مع المولود الجديد !!!
اولا احب اكولك الف الف مبروك ووحمد لله على سلامتك
اريد احجيلك عن اول ايام مع المولود الجديد حتى اسهل عليك المهمه
على الرغم انه الصفحه مليانه ببوستات عن هذا الموضوع
١. افهمي انه هذه هي فتره تحضيرات
هذه الفتره هي فترة غريبه من حياتك
تحسين انه ما تعرفين شنو اللي يصير وياك
وياها احساس بعدم الامان انه اللي كاعد تسويه صح ام خطا !!
ولو اني وياكم و سهلت المهمه كثيرا عليكم على ما اتصور
بس يبقى الموضوع بوستات من طبيب اطفال و انتوا اللي دا تتعاملون ويه الاطفال على ارض الواقع
تهيئي للموضوع
اخذي راحتك للاستعداد
شويه شويه راح تسوين الروتين
و راح تترتب حياتك
٢. هرموناتك بعدها مخربطه
على الرغم من انه الحمل خلص
بس راح تبقى هرموناتك مسيطره على المشهد القادم
راح تكونين جدا حساسه
و عادي كم دمعه تنزل بلا سبب
عادي عادي
فتره و تعدي
٣. راح ينام طفلك كثيرا
و هذا عادي
خليه ينام
و انت هم نامي
تحتاجين الى الراحه
و اللي يكولك اشتغلي
كولي ما بيه
هذه مو دعوه للتمرد
بالعكس انت تستحقين الراحه و الطفل يستاهل كل الوقت اله
٤. لا تشغلين نفسك بالكمال
ماكو شي كامل
سوي فقط اللي عليك
و الضروري
راح تكونين جد مشغوله بطفلك
٥. راح يرضع الطفل هوايه
كوني مستعده للرضاعه الكثيفه
راح يرضع طفلك هوايه
سواء رضعتيه طبيعي او صناعي
و الاثنين متعبات
بس تذكري لا تنطين اي رضعه بمميه غير معقمه ( مفورة اما بجهاز التفوير او بالمعقمه)
تاكدي انه هذا الاسبوع الاول او الاسبوعين هو اكثر فتره راح يرضع بيه الطفل
٦. حفاظات حفاظات حفاظات
عادي يرضع هوايه اذن عدد مرات خروج هوايه
ممكن عادي جدا توصلين الى ٦ مرات خروج باليوم
و عادي جدا كلما ترضعين الطفل راح يصير عنده خروج
بحيث تحسين انه دا تدورين في حلقه مفرغه
ترضعين ____ خروج
ترضعين …….. خروج
عادي اطمئني هو هذا الطبيعي
٧. البكاء
ما اعرف ليش الاوفره بموضوع بكاء الطفل
ما يعرف الطفل يتكلم
من العادي يبجي لان بردان او حران او مو نظيف او ضايج
٨ . اول حمام للطفل قد يكون تجربه مخيفه للام
بس لا تخافين منزل بوست عن موضوع الحمام للطفل بالخطوات شوفيه
و منزل هوايه اشياء شوفيهن
اقريهن
لسه و لحد الان تجيني اشعارات على الصفحه انه لايك او تعليق على اول بوست بالصفحه
٩. تغيير الملابس حلو و يشعرك بالسعادة
بس لا تنسين كوني عمليه
مو المهم يكون حلو بملابس ضيقه
المهم يكون مرتاح بملابس مناسبه للجو و ما مضايقته
هذه ٩ شغلات كتبتها الكم عن مما ينتظرك باول اسبوع الى اسبوعين
اتمنى تفيدك برحله الامومه الطويله
د. سيف سمير البياتي
اخصائي طب الاطفال
