بمستشفانا، احنا ننطي علاج امراض الدم للاطفال
عدنا طفل عمره بين ٣-٥ سنوات اسمه حيدوري
كلما ادخل للردهة اجي يمه اكوله انت بنين ؟
يكول لا اني حيدوري و ينهزم لان بنين عدها ابرة و اني جايبها حتى انطيها
كل شوية اكوله انت بنين ؟ وهو يكعد يبجي كلاوات حتى اعوفه يكول لا اني مو بنين اني حيدوري، اكوله ميخالف خلي انطيك الابرة بمكانها
وهكذا على هالحالة يومية اتحارش بيه من وقت دخولي للردهة لحد ما انطي العلاج واطلع
هسة صرنا اصدقاء لدرجة اذا اني ما اتحارش بيه هو يتحارش يكولي اني مو بنين اني حيدوووورريي و يجر وياها ضحكة انتصار عود ما راح تنطيني الابرة
الشيء الحلو الي لاحظته عدا هالمواقف الطريفة بيناتنا انه اغلب المرات الكيه يحجي مع جده بالموبايل
دددوو اريد دجاج
مرة لكيته يطلب من جده دجاج
مرة لكيته يطلب سمك
اليوم يبكي يريد تشريب عالريوك و ديكولون اله عالغدا نجيبلك
كلش حلو انه الطفل هو الي يطلب اكل بيت
ما يريد الحلويات ولا تهمه
والشيء الثاني والاهم هو الجد الي متفرغ للحديث مع حفيده هالشيء كان نتيجته طفل يحجي سوالف اكبر من عمره كون اهله يحجون وياه هواية
الي اريد اوصله الكم
احجوا وية اطفالكم
احجوا وياهم ودردشوا هواية، هالشيء يعلمهم عالكلام و اللباقة
وكلوهم اكل بيت
لا تعلموهم على الحلويات والنساتل
خلي ياكلون اكل البيت
شايف طفل يبجي إذا يتأخر الغدا
وشايف آخر ياخذ ربع قبل الغدا يروح يتغدا نستلة
—-
حساب التوعية على الانستاغرام
https://instagram.com/dr_salmand?igshid=qbd41hnknyb3
د. سلمان داود
مقيم اقدم اطفال
from د. سيف سمير البياتي