بنيه جميله بنت ناس من اهلنا الطيبين المثقفين
جابتها الام شايلتها بكل حنيه
اتذكر نفسي ركضتلها
شفتها شاحبه
كلتلها شنو اللي صار
كالت ما ادري الصبح تخشبت وراها هيجي صارت
سوينا كل الاشياء الضروريه
و دخلت للانعاش في وقتها
اخذنا الها مفراس و تحاليل دم
و تبين اصابتها بنزف الدماغ
و لما سالت الام عن مكان ولادتها كالت البيت
و لما سالت عن فيتامين K هل اخذته او لا
اكيد كان الجواب لا
بقت هذه البنيه بالانعاش ٢٥ يوم الى ان تولاها الله برحمته
هذه البنيه و غيرها ما كان توفت و غيرها ما كان تعوق لو بس ضاربين ابره فيتامين K بعد الولادة مباشره
حضريها و خليها بجنطه الولاده و اخذيها وياك
سعرها يمكن بكد باكيت جكاير او شويه اكثر بس تحمي طفلك من العوق و النزف
د. سيف سمير البياتي اخصائي طب الاطفال
