#تربية_الاطفال
#التهديد
قبل ماندخل بالموضوع اذكر وانبه
بوستات التربية ناخذ منها الي يوالم بيئتنا وشخصية ابناءنا
ابنج، ميشبه ابن الجيران
تربيه ابنج
متشبه تربيه بنت الجيران
الطفل الي شخصيتة ضعيفة وهش
مو مثل الطفل الي يدخل بالعين وعنده غرور
طريقة تعاملنا وي الطفل الاول اكيد ومستحيل تشبه طريقة التعامل مع الطفل الثاني
لذلك وجب التذكير، من حقك تعلق وتنتقد بس واجب عليك تعلق بادب واحترام
اخذ الي يناسبك واترك الباقي 🙃
التهديد،
هي طريقة قديمه ولاتزال متبعة كاسلوب في التربية
ممكن جدا يكون اسلوب فعال
وممكن جدا يكون اسلوب فاشل فشل ذريع
وهذا الشي حسب تطبيقنا للتهديد وحسب التهديد نفسه
اول شي
تذكر دائما وابدا اذا هددت بشي لازم تكون فعلا ناوي تسوي
اذا انت مناوي تسوي ابدا ابدا لاتهدد لان هيج انت دتخلي صورتك مهزوزه كدام الطفل وياخذ عنك فكره انك حجي بلا فعل
وبكل مره حتضطر تزود من مستوى التهديدات بالكلام ، وبكل مره تصعد مرحلة من الكلام البشع
دون اي ايجابيه
مجرد يكون (تنفيس عن غضبك) وزمجره فارغة
ناخذ مثال ،
اكسر راسك
اشمرك بالشارع
اعلكك بالبنكه
اجويك بالنار
وغيرها وغيرها
هاي تهديدات غير قابلة للتنفيذ!
فكلش ماله داعي تستخدمها وهي عباره عن اسلوب ضعيف لان نعيد ونذكر حجي بدون فعل
اما اذا تجرأ المربي وحاول ينفذ هاي التهديدات فالمربي حاليا مصار مربي صار عبارة عن وحش مسعور ومجرد من اي صفة من صفات التربية والانسانيه واكيد هو حيكون مجرم حقيقي بنظر القانون الشرع والاعراف والانسانية
لذلك نستثني هاي الفئه من البوست، ونعتبر الي ديقرا هو شخص طبيعي ومربي حقيقي يحاول ان يلكه نقط تفاهم مع الطفل
فنختصر ونكول
اي تهديد انت غير قادر ولا ناوي تنفذه لاتكوله ولاتنطق بي ابدا ابدا ابدا
لان مجرد ما تفوهت بي صار لزاما عليك التنفيذ
فاختار تهديد واقعي , قابل للتطبيق، غير مؤذي
حتى نحصل نتيجه من تهديدنا وهو ردع او ايقاف الطفل عن القيام باعمال خاطئه
ناخذ مثال
اذا ضربت اختك مره لخ بهاي اللعبة اخذها منك واضمها
وهنا نكون جادين ودننتظر التنفيذ وبمجرد ان يرجع يضربها مباشره تنسحب اللعبة وتنضم بدون اي نقاش ولا تردد حتى لو بجى وسحل نفسه بالكاع
مثال اخر
كافي تصيح، اذا صيحت مره ثانيه ازعل عليك وما اقرإ لك قصه اليوم
وايضا نفس الشي مجرد يرجع يصيح الام تاخذ وضعيه الزعل وتكله خلاص ماكو قصه (هاي على اعتبار هو الطفل يحب القصه وهي شي مهم بالنسبه اله)
تتبدل حسب شخصية الطفل، مثلا ماكو طلعة اليوم / ماكو كارتون/ ماكو حلويات
طبعا يفضل غالبا ان يكون التهديد هو بعقوبه من جنس الفعل
بس مو دائما يكون حاظر بالبال عقوبة كل فعل شنو
فممكن نحول التهديد على حرمان من اشياء يحبها الطفل بشكل معقول، وطبعا ممنوع نحرمه من حقوقه
يعني ميصير تهديد:
تره ماكو غده
تره ماكو مي
تره ما احبك
هاي دخلنا هنا بالابتزاز العاطفي والجسدي وهذا ايضا خط احمر وتجاوز على الطفل
ماكو اي فعل يسوي الطفل يحرم عليه حقوقه الاساسيه ، من غذاء وحب هاي الامور تعطى بدون شرط وبدون قيد بدون اي مقابل
هل هي فعاله؟
نعم فعاله لعمر 3 ونص الى 4 فما فوق وحسب نمو الطفل العقلي والاستيعاب وطبعا متتنفذ للاعمار الاصغر لان صعب يفهم العلاقه هاي وصعب يرتب علاقه فعله بالتهديد وبالعقوبه
الاعمار الاصغر افضل توجيه هو حل المشكله الي سببها الطفل،
يعني ضرب طفل نوجهه يعتذر
سكب ماء نوجهه يمسحه
وهكذا
اما الاعمار الاكبر فهو تجاوز هيج مرحله ويعرف كلش زين هيج فعل خطا اذا كان عن قصد
واكيد لاننسى هو كل فعل يسوي الطفل يقصد بي لفت الانتباه والاهتمام
فمع العقوبه والتهديد ننطي اهتمام بباقي اليوم ونمدحه على تصرفات صح
حتى لايحس احنا ضده أو نكرهه او بس نريد نلزم عليه الزلة
واكو طريقة الاختيار بين شيئين ممكن تكون الطف من حده التهديد (والي غالبا نستخدمها عند الغضب)
الطريقة الاختيار الي هي مثلا:
تكعد تعلب بهدوء لو اشيل الالعاب واضمهن؟
واذا بقى يعيط ويشمر طبعا ننفذ الخيار الثاني وهو أن تنشال الالعاب وتنضم
واحب انوه ان لايكون كل الكلام مع الطفل بهيج صيغ،
يعني هاي نستخدمها باوقات معينه من تكون الام تعبانه ومالها طاقه تساير وتحاور
من يكون الطفل جدا مشاغب وطالع عن الحدود
باقي الاوقات نحاول نكون اكثر هدوء مع الطفل ونوجهه ونشتت انتباهه ونلهي باشياء اخرى من نشوفه كاعد يشاغب او يتصرفات تصرفات خاطئة
مع مودتي 🌷
د.اسماء اسماعيل البدري
from د. سيف سمير البياتي