هذا الهشتاك الجديد الي حينزل بي مواضيع التربية علمود لايتداخل وي هاشتاك وزارة التربية
السؤال العظيم الي يتردد الف مره باليوم من يسوي الطفل احدى الكوارث
#ليش_هيج_تسوي ؟!!
اغلبنا ، ويجوز كلنا نوجه هذا السؤال للطفل
واحنا فعليا مرات مكاعد نستوعب هو ليش هيج سوه
وبل ننتظر منه جواب!
واحنا بالمقابل كبالغين ،،، نسوي هواي امور ومنعرف نجاوب عليها لان ماعدنا الشجاعه ان نعترف بقصورنا ولا عدنا المنطق الكافي حتى نبرر
يعني مثلا، تصدف نطلب اكل غير صحي وببسي وناكل واحنا بداخلنا نعرف هذا غلط وغير صحي، لكن طبعا اذا احد واجهنا وكال هاي ليش محنكلة والله نعتذر مجان قصدنا !
لان بالحقيقه احنا عجبنا ناكل هذا الاكل لان نحس بنوع من السعاده المرتبطه بكميات السكر الي تستهلك ونستلذ بالطعم الحاد
بس ماشفنا بحياتنا شخص كال والله اكلت هذا الاكل الغير صحي لاني اريد استشعر الطعم الحاد ! 😅
نرجع على الطفل
الطفل كلشي يسوي هو بدافع
هذا الدافع يندرج تحت بوابتين:
📌الاولى : الرغبة العارمه في الاستكشاف والتجربه
📌والثانيه: رغبة في جذب الانتباة والحصول على الاهتمام
لذلك اي مصيبه يسويها الطفل بدل لاتسال هاي ليش وتظل حيران
جاوب نفسك وكول هو طفل واكيد ديسوي حتى يستكشف او يريد يجذب انتباهي
والحل؟
انطي انتباة اكثر واني ااكد لكم كميه الكوارث تقل
وبنفس الوقت خلي يستكشف الاستكشاف الامين تحت نظرك وموافقتك
🛑90% من شكاوي الامهات لشغب الاطفال يصير باوقات الام نفسها مريضه او عدها امتحانات او مضغوطه ومتوتره لاي سبب كان
وهذا مؤشر واضح ان الطفل استشعر ان امه مشغوله عنه فيبدي يسوي اشياء حتى يجذب انتباهها
وطبعا اكيد هو ماعنده قدره يجي يكلج
ماما انني اشعر بالوحده وعدم الاهتمام لذلك ارجو ان تنتبهي لي فانا هنا موجود ! 😅
وطبعا اكيد من المستحيل ماكو عائلة متمر بظروف صعبه
لذلك كلما كان عدكم رصيد من العلاقات اللطيفه وي ابنائكم كلما قلت كميه المشاغبات وقت الازمات
العلاقه بين الاطفال وللاهل هي علاقه تراكميه لسنوات،،
ونعيد
بدون سؤال
هاي ليش!
لان والله محيعرف يجاوب 😂💔
مودتي 🌷
د.اسماء اسماعيل البدري