حبيت احجيلكم خطوات التطور
و طبعا اكو بوستات سابقه عن الموضوع
و اكيد مو قانون هذا كل طفل و اله عمره
🍓عمر الشهر
من ينام ع بطنه شويه يرفع رأسه
يحب الوجوه
يسد عيونه بالضوء العالي
يجيب ايده ع راسه
🍅عمر الشهرين:
يظل يلحك الشي بعيونه
يناغي
يعرف و يميز وجه امه و ابوه
يميز أصابعه
🍉الشهر الثالث
يفتح و يسد بايده
يلزم الخرخاشه
يدفع الكاع برجله من تلزميه
من ينام على بطنه يرفع رأسه ٤٥ درجه
🍎الشهر الرابع
يكلب من بطنه على ظهره ( ممكن ما يسويها )
يباوع ع الأشياء الصغيره
يضحك
يخلي كلشي بفمه و ممكن بال ٦ اشهر يلا
🌶الشهر الخامس
يوكف على رجله من تلزمه من فوك
يتفاعل وياك بالحجي
يضاعف وزن الولاده
يلعب باللعبه لاثنين ايديه
🍭الشهر السادس
يعرف اسمه و يندار من تصيحه باسمه
يحب يلعب و يتونس بالملاعيب
ممكن يتعلم يشرب بالكوب المثقب 😉
يبدي يطلع اصوات رطبه من يسولف
🍄الشهر السابع
تكدر تعرف حزين لو سعيد من الصوت
يبدي ينام ع بطنه و بس يستعد للحبي
ممكن ياكل طعام الاصابع finger food
🍇الشهر الثامن
يلزم الملاعق من ياكل و يحب ياكل بنفسه
يكعد وحده و ممكن يتأخر للشهر الجاي
يطك كف بكف اذا تعلمه
🐙الشهر التاسع:
يباوع ع نفسه بالمرايه و يعرف نفسه
اذا تسحبه يوكف
يشمر الشي و يباوع عليه
يسوي باي باي
🐞الشهر العاشر :
يشرب بالكوب العادي 😉
يتشبث بالآثاث
يضرب شي بشي
يكول ماما و بابا و يعرف المن دا يوجهها
🌷الشهر الحادي عشر:
يزحف
يحب الكتب
يرجع الألعاب للصندوق مالتهن و يطلعهن منه
و ووزنه يصير ٣ امثال وزن الولاده
يعني ابو ٣ كيلوات يصير ٩
او ممكن للسنه
❤عمر ال ١٢ شهر:
يمشي بمساندتكم
و المشي الكامل ممكن يتأخر إلى سنه و نص
أما اللي يحبي على مقعده فممكن للسنتين
ياخذ و ينطي بالألعاب
من ما يريد شي يدفعه
ينزع الجوارب و الشفقه
و ارجع و اذكر كلشي نسبي
د. سيف سمير البياتي اخصائي طب الاطفال
from د. سيف سمير البياتي