داومت بتركيا و بالعراق
و رحت بدورات للإمارات و مصر
لو خليت تجربتي كعرب مقابل الاتراك
المشكله الوحيده اللي تكولها الام العربية و ما تكولها الام التركيه هي ( ابني ما ياكل )
المشكله من تسمعها من الام التركيه يكون فعلا اكو شي مرضي و وزن الطفل اقل من مقاسات النمو التركية ( عدهم جدول خاص بيهم مو مثلنا نعتمد على جداول اما الصحه العالميه او مركز السيطرة على الامراض الامريكي )
في حين في اغلب حالاتنا يكون الموضوع مشاكل نفسيه عند الام لانها ببساطه تقارن ابنها ويه ابن حماتها و هذه دعوه للامهات انه لا يكولن شكد اطفالهن ياكلون لان اكو من يراقب عدد اللقمات و كميتها و لاكثر من ام
النمو يقاس بالوزن و الطول و هذه امور تحددها الكثير من الثوابت و المتغيرات مثلا وزن الولاده و طول الام و الاب و نوعيه غذائه و هرموناته و غيرها
.
شكوى ما ياكل ما ياكل ما ياكل و الطفل وزنه طبيعي او فوق الطبيعي لازم تخليلها حد
ما ياكلون لان ما توكلوهم ببساطه
مستسهلات العصير و الجبس و النستله و المميه و تصيحن ما ياكل
العصير يسد شهيته يوم كامل
و المصاصه تسد شهيته 3 ايام
قطعه شوكولاته صغيره تسد شهيته 8 ساعات
و اي نعم النستله اطيب من تفاحه
و اي اكيد راح يفضل النستله على التفاحه
الحليب و كثرته تسد الشهيه
و نيدو مثلا عجبني من كاتب على العلبه مالته مرتان يوميا و انت تنطيه ١٦ الف مره !!!
هذا العصير الطبيعي
اما العصير الصناعي فهذا كارثه الكوارث
و قبل كم يوم صديق صاحب اسواق يكولي دكتور ما تنزل شي يخص مشروب الطاقه لان ما اريد ابيع للجهال مشروب طاقه يجيني ابوه يكولي يمعود دنطيه
ما تنزل انه مو زين
كلتله شانزل و هو اصلا ممنوع تحت 18 سنة
يكولي دكتور شتحجي دا يشربوه بعمر 10 سنين
.
الببسي و المشروبات الغازية ابشركم صايره بالمميات و الامهات تفتح قواطي بيبسي و تشرب جهالها
و ام من الامهات تكولي بنتي ما تشرب مي بس تشرب عصير !!!!!
مختصر ما ذكر
1. راقبي وزن طفلك مع طبيبك
2. لا تقارنين ويه اطفال الاخرين
3. تذكري ان اكل الطفل اسبوعي يعني يوم يأكل يوم لا
4. سوي فحص فقر الدم اذا كان البوست يشملك لان فقر الدم عدنا كارثي
5. اكطعي الحلويات و العصير طبيعي و صناعي بسكر او بدون سكر و لا مره
6. لاتركضين وره طفلك و تحجين بموضوع الاكل كدامه لان مل و كل و تعب و كرهتيه بعيشته
شارك و انقذ حياة طفل من سوء التصرف
بالاخير رساله للاباء
( من مره اللخ تكولك ما ياكل كوللها اتركي الطفل بحاله ) و اكطع الحلويات و العصير و الجبس
د. سيف سمير البياتي اخصائي طب الاطفال
