#ستة_اشياء_لاتسويها ابد مدام طفلج بعمر دون السنه
ثانيا: لاتخلين الاب يسحب ايده وتشيلين المسؤلية كلها
#دور_الاب
#التربية
شفت مشكله ناشريرها بوحده من الكروبات..
المشكله جانت الام تشكي أنها عدها طفلين 👩👦👦والاب ساحب ايده تماما..بحيث لدرجه تكله بس حط الطفل بحضنك اريد امسح وهو مو يمه.. المشكلة مو هنا…
المشكلة التعليقات كلها يكلولها عادي!! 😶😶
لا والله مو عادي!! 😑
الخلل وين؟!
الخلل اساسا بتربيه الذكر بشكل عام.. مجتمعنا يربي أنه ميشيل مسؤوليه الا ما ندر.. 👎
زين هسه منريد نكعد ندور عن اساس المشكله لان هسه صارت المشكله وانتهت.. لازم نبحث عن الحل ..
🌼اول شي جانب الزوجه..” للاسف حتى هاي براسج 😆”
⏪جانب الاب بوست وحد نحجي أن شاء الله
نكول للزوجه : لازم لازززززم تخلي يحس بالطفل من اووول يووووم حممممل حتى قبل الولادة ..
شلون؟ 🤔
1️⃣اولاً:من عرفتي حامل طبعا تبشري باسلوب حلو..طبعا هذا هو الغالب بأول طفل.. لكن للاسف تتراجع هاي الفعاليات بالطفل الثاني أو الثالث ..
الفكره هنا حتى لو عاشر طفل لازم تحسسي بالفرحه .
مو تجين مبومه لو تولولين وعزه العزاني وشلون وإني جنت اخذ مانع ومن هالسوالف. صار طفل خلاص انتهى احمدي ربج وفرحي انتي وزوج..
2️⃣ثانياً: نزلي تطبيقات مال متابعه الحمل وكل شهر بشهر تدزيله ابنها هسه بكد الخوخه مثلا .. ابنها هسه كمل العمود الفقري.. ابنها هسه بدت ملامحه وهكذا..أو تتفرجون التطورات سوى🥰 اذا هو يتواجد يمج لوقت كافي.
3️⃣ثالثاً: من يبدي يركل خلي يلزم بطنج ويحس بركلاته.. وكولي له يااا شلون يحب يتحارش بيك .. 😍 واحجي وي الطفل كليله هذا بابا ديسلم عليك .. وقبل النوم كولي للاب مثلا مكلت للبيبي تصبح ع خير أو مقريتله معوذات..
4️⃣رابعا: دزي صور ع تلفون لاباء وي أبنائهم .. بمختلف الأعمار.. كل هاي حتى تعزز فكره الابوه..
الرجال عدنا غايبه عنده هاي المشاعر تماما .. لازم تحفيزها وتخزنيها بعقله الباطن .👍
5️⃣خامسا: خلي يشوف الطفل بالسونار وياج.. صحيح هواي عيادات متسمح بس هم اكو يقبلون.. مو شرط كل زياره بس مهم جدا يشوفه قبل ميجي حتى لو مره وحده.
6️⃣سادسا: وقت الولادة تكعدي يجي وياج واذا يداوم يأخذ إجازة مو ترحين وي اهلج وهو آخر من يعلم! 😑
ويبقى يمج بالمستشفى .. منكول مثل الاجانب خل يحضر الولادة لان هالشي للاسف شبه مستحيل بس اقلها يبقى بالمستشفى🏥 واذا طبيعي خلي يسمع المج وصراخج..🙊
واذا عمليه يشوفج ويسلم عليج قبل متدخلين للصاله.. مو نايم بالبيت لو طالع وي جماعته ويخابروه مبروك مرتك جابت 😑😑
7️⃣سابعا: اجى الطفل بخير وسلامه لازم تخلي يشيله لتكليلي ميعرف تره انتي هم متعرفين! خلي يكون علاقه وياه .. وياحبذا يكبر ويأذن بإذنه مثل معلمتنا السنه النبوية.❤️
8️⃣ثامنا: رجعتوا للبيت مو كبل تختفين ببيت اهلج وهو يروح يسرح ويمرح وي أصدقاءه 😶
اقلها اول يومين يبقى يمج ويبدل حفوظه البيبي ويشوف العقي.. ويسهر وياج ويشيل الطفل يتريعه.. تكولين عنده دوام وميكدر اوكي يوم بالاسبوع جمعه ع سبت خل يسهر ويحط الطفل ع جتفه وينومه ويغنيله.
هاي الفتره ذهبيه وبسرعه حيكبر الطفل بيها لازم تخلي يشوف شلون دينمو طفلكم..
⏪هاي الاشياء اسااااسيه مو كماليات.. اذا هاي مصارت لاتتوقعين فجاه يصير حنين ع طفل !😅
اذا هو محس بي ولا كوّن مشاعر تجاهه شلون حتصير علاقه ابوه؟؟ خوما هي تنزل من السماء عليه بمجرد حملتي وجبتي! 😕
📍الغلط هسه وين؟ الزوجه تهمش هاي الأمور وتلغي دور الزوج بهاي الفترات .. يجوز بحسن نيه أنها تساعد أو يجوز بحجه ميعرف أو مالها خلك اصلا! بس تذكري انتي سويتي شرخ كلششش چببر بعلاقتهم اذا منطيتي مجال .. وحتحتاجين جهد أعلى وتعب اكبر لإصلاح هالشق من حيكبر الطفل.. هاي اذا تصلح.😟
زين غلطنا وأجى الطفل واحنا ممسوين ولا وحده من هذولي.. بعد اكو مجال .. لاتخلي يسحب ايده طالما بعده جوه عمر السنه
📍زين هم غلطنا وكبر الطفل وعبر سنه.. لتكولين هاهيه شسوي ! تكدرين تسوين هواي احجي وي الاب وخلي يكعد وي الطفل يلاعبه يطلعون سوه خصوصا اذا تعلم ياكل .. يودي مطعم بالبدايه بمساندتج بعدين اسحبي نفسج.. وتذكري اذا انتي اقتنعتي بأهميه الموضوع حتلكين الف طريقه وطريقه .. استغلي ذكائج كامرأة وحيتلج كأنثى . 😉
📍زين شنو حيصير اذا عفته وبقيت اني شايلة المسؤوليه.. يمكن وحده منكم تكول هاي أبرد راس الي! لاعزيزتي هذا مو شي يخصج وحدج حته تقرري .. هذا حق الطفل.
ليتيتمين ابنج وابوه بعده عايش!
الموضوع له تكمله .
بهاشتاك #دور_الاب
د.اسماء اسماعيل البدري
