شراب الالتهابات و شوكت نصرفه و ليش يضعف المناعه و رحت للطبيب و انطاني شراب التهابات
و شوووون ما انطي شراب التهابات ؟
هذه اسئله ببال الكل امهات و اباء
💜شرابات الالتهابات تنصرف دائما في حالات الحراره
و الحراره ابدا ما تعني انه لازم شراب التهابات
و لو كل طفل يصخن ياخذ شراب التهابات كان ما يكفينا بكد العالم مصانع لشرابات الالتهابات
💙المضادات الحيويه هي مواد كيمائيه تعالج الالتهابات البكتيريه
في حين اغلب التهابات الاطفال هي فايروسيه !!
يعني اصلا ما يشتغل عليها المضاد الحيوي
النشله مثلا مرض فايروسي
الانفلونزا مرض فايروسي
اغلب حالات الاسهال مرض فايروسي
كورونا مرض فايروسي
التهاب القصيبات مرض فايروسي
قسم مننا ننطي المضاد الحيوي ويه اول حراره في حين المضاد الحيوي يحتاج يومين الى ٣ ايام لما يشتغل و المفروض تبدين انت بخافض الحراره
مو سباعيه ابدا انه انطيت سفكسيم او اموكسيل
كولي انطيت خافض حراره اكولك حياك الله
ثم كل التهاب و اله مضاده الحيوي الخاص بيه
يعني التهاب اللوزتين ينكتبله شي
غير عن اللي ينكتب لالتهاب المسالك البوليه
❤ زين صدك يقلل المناعه؟
طبعا يقلل المناعه لان هو مضاد حيوي خوما يروح يكتل البكتريا المو زينه و يعوف البكتريا اللي معروفه بالنافعه لا طبعا
راح يحرك الاخضر و اليابس و يكتل البكتريا ككل
و البكتريا النافعه تدافع عننا ضد البكتريا الضارة
💜 و مثل كل مره راح نقرا تعليقات دكتور مو رحنا لدكتور فلان و سجللنا مضاد حيوي قابل الدكتور ما يعرف؟
راح اخليلكم هذه الصوره بالتعليقات مختومه بختم مركز السيطره على الامراض الامريكي يكول بيه انه المضاد الحيوي بامريكا يصرف في 30% بدون داعي
لذلك التزمي بالمضاد الحيوي و جرعته و اهم شي مدته من طبيبك
💙 اكثر من اعطاء المضاد الحيوي في غير محله يؤلمني تقليل الجرعه من قبل الام او اخرين من القطاع الصحي بحجه هوايه عليه
و النتيجه انت ما انطيت الجرعه اللي تقتل البكتريا تعرف شنو سويت؟
قويت البكتريا عليها و صارت تريد المزيد
و هذه في بدايه عيادتي فتت بيها في مشاكل لان ما متعودين على الجرعه
ابره السفترايكزون ( المسبورين ) جرعتها هي 50 ملغرام للكيلو
يعني من يجي طفل وزنه ٢٠ كيلو ننطي ابره ام ال 1000
راسا يتفاجيء الاب او الام شوووون
و اني اكوله يابه هذه جرعتها
نفس الشي الاموكسيل اني اكتبه مره وحده باليوم في حالات التهاب اللوزتين استنادا على اخر توصيه من كتاب طب الاطفال
شووووووون دكتور مو لازم ٣ مرات
و هم مو هوايه عليه
💚 شيء اخر مؤلم انه خلصت الحراره يلا اكطع كلشي و تبقى البكتريا موجوده و تقوى و بعد كم يوم ينعاد المرض
من نكتب ٧ يوم تكملين ٧ يوم الا اذا كالك طبيبك اكطعي
💜 اخر جمله المضاد الحيوي حتى يشتغل و هذا الوريدي اللي ننطيه بالمستشفيات يحتاج ٤٨ ساعه الى ٧٢ ساعه
اذا ما فاد بعد هذه الفتره نبدله و حتى لو اكو تحسن نكمل عليه
💜 التزمي بتعليمات طبييك
❤ لا تنطين مضاد حيوي بكيفك
💙 اضبطي جرعه المضاد الحيوي
💙 كملي كورس المضاد الحيوي
💜 اكثر عرض جانبي للمضادات الحيويه هو الاسهال و القيء
💚 المضاد الحيوي يحتاج يومين الى ٣ ايام بديلا يشتغل
💛 المضاد الحيوي يقلل المناعه
د. سيف سمير البياتي اخصائي طب الاطفال
