شون اتعامل ويه النصائح ؟
و ولدتي طفلك بخير و سلامه و الف مبروك و بديتي تستلمين التبريكات و وياها اطنان النصائح من اختيار الاسم لاختيار نوعيه الرضاعه إلى إلى إلى
هذا البوست يعلمك شون تتعاملين ويه هذه النصائح
1. حافظي على هدوئك
اعرف ان هرموناتك بعد الحمل ملخبطه للأخير بس هاهيه لازم تحافظين على هدوئك و اعصابك
طبعا هذا بالاضافه إلى التوتر اللي يضيفه طفلك
لذلك خليك هادئه
2. اسمعي و فلتري
مو كل النصائح سيئه
مو كل النصائح جيده
من المهم ان تسمعي لهذه النصائح ممكن تكون مفيده
ممكن تكون علميه جدا و انت نظرتك خطأ
3. اهتمي بمصدر النصيحه
يعني من والدتك و تريد مصلحتك
لو شخص آخر ما يعرفك اصلا و مجرد يريد يسولف !
هوايه من النصائح هي مجرد انتقادات مبطنه بحجه نصح لذلك لا تاخذين النصيحه من الناس الثقه
4. اختاري معاركك بعنايه و خلي الحدود لطفلك على حسب تربيتك و نظامك و روتينك
وحده من أهم المعارك هي تدليل الجدات و الاجداد للاطفال
فمن طفلك يكولك اني جدو يشتريلي نستله و ينطيها الي قبل الغده كوليله اني مو جدو و النستله موعدها مو هسه و ما تاخذها الا تحسن التصرف
5. تثقفي !
نقطه مهمه ان تكونين تملكين الثقافه الضروريه للتربيه
اقري من الان
اقري و انت عزباء
اقري و انت مخطوبه
اقري و انت بعدك حامل
المعلومه صارت متوفره و مجانيه
مجرد اقري
راح تصنفين المعلومه هل هي مفيده لو مجرد كلام في شبك ؟
6. ثقي باحساسك
رغم ان النصائح بالملايين بس ثقي بنفسك باحساسك باللي انت تحسيه
اؤمن جدا باحساس الأم
بس نخلي الأشياء الرقميه الواضحه خارج هذا التصنيف
مثل احسه ضعفان و الطفل وزنه اكثر من طبيعي
احسه مصخن و انت ما قايسه حرارته بمحرار
7. ماكو عائله تشبه عائله
النصيحه اذا جربتها آلاف العوائل ممكن ما تفيدك و لا تفيد طفلك فلذلك مو شرط تكون النصيحه فعاله
8. اسألي طبيب الاطفال
أحيانا قد تشكين بشيء و الشيء طبيعي او مرضي و هو راح يبينلك
أطباء الاطفال يتعاملون يوميا مع مئات الاطفال لذلك خبرتهم تكون واسعه
9. الزمن يتغير
من تنصحك فلانه بالكحل و الثوم و الكوي و السكوه فاعرفي ان زمانها قد مضى و ما عاد اكو مكان لهذا التخلف
و من تكولك فلانه ان البخاخ يتعود عليه سوي البخاخ كدام عينها و كوليلها اي اني اريد اعوده
الزمن يتغير و العلاجات تتغير و حتى الاطفال تتغير
قبل 1992 كانوا ينومون الاطفال على بطونهم بس بعد حمله back to sleep
صارت النومه الأكثر أمانا هي النومه على الظهر
10. كوني صريحه
الكثير من الأشخاص اللي يسدون النصائح كوليلهم الان جوابك اذا انت متأكده من صواب قرارك
يعني وحده تنصحك بالنستاكورت لطفح الحفاظه كوليلها ممنوع عيني يسوي سكر و ضغط و هكذا
11. خلي حدود
هذه اهم نقطه
يعني لا تسمحين للي يعرف و ما يعرف ينصحك و تطبقين و الطفل من سيء لاسوء
خلي حدود للاجداد و الجدات
اسمع من إباء و امهات يكولون مو جده ما يقبل
مو جدته ما تقبل
مو خالته ما تقبل
امي انت امه مو هم
انت ابوه مو هم
انت المسؤول مو هم !
12. ثبتي قواعدك
و بعد ما سيطرتي ع الوضع و حددتي الحدود
اجه الان الوقت لتحديد الوضع و نبذ كل النصائح الغير مفيده
وضحي للكل انه انت الأم و انت الاب
انت المسؤول مو هم
د. سيف سمير البياتي اخصائي طب الاطفال
from د. سيف سمير البياتي