صارلي كم يوم اريد اكتبلكم عن حادثه مرت قبل ايام
حادثه انتحار طالب صف سادس اعدادي لان ما طلع معدل زين
اكتب بمفكرتي و امسح اللي كتبته
طبعا اكيد اتردد بهيجي موضوع شائك
الشاب انتحر بدون تردد و انهى حياته
ما اعرف بس اني اشوف انه جزء كبير من معاناه مراهقينا تقع على عاتقنا
– يا اهلنا مسحنا شخصياتهم بالارض قسم منكم يعاقبوهم على كل شيء و اي شيء و يردون من اطفال يكونون مثاليين و لو الطفل تنفس راح ينضرب او تحجون عليه !!
– ما ننطيهم مجال يغلطون و يصلحون الخطا
تكلب الدنيا الام اذا انكسر ماعون او شويه عصير انسكب !
– تقارنون طفلكم بكل احد و اي احد و تتعبون نفسيتهم و نفسيتكم و كانما ابنك رقم على ميزان او ابنك درجه بامتحان
– ما نشجعهم يبذلون مجهود و الباقي على الله لا نجهدهم يكونون ناس مو هم و يتصرفون حسب اهوائنا مو اهوائهم و شخصيتهم و بعدين نكول عليه من يكبر حبيب امه !!
– اعرف و الله الاطفال تربيتهم صعبه و تصرفاتهم متعبه بس انت كذلك مو ملاك انطيه فرصه يعدل اسلوبه و عدل اسلوبه بالحسنى مو بالضرب او الغصب او العصبيه
– لا تعاملوهم كاملاك خاصه تسمنوهم براحتكم و تحجون بمكانهم و تجبروهم على كليات و معدلات و تقارنوهم ويه غير ناس
افهموا انه انتم مصدر امانهم بهذا العالم القاسي
افتحولهم احضانكم
– بالاخير فهموهم انه انتوا موجودين لاجلهم و انه انتوا تشوفوهم الدنيا كلها و ان ارواحهم عزيزه و غاليه علمود لا يجي يوم و نخسر شاب اخر بسبب اصرارك على المقارنه باخر
– جدا حزين على كل شاب انتحر
جدا حزين على مراهق كاعد ينجبر من قبل اهله
جدا حزين على كل ام و اب يقارنون طفلهم باطفال الاخرين
كلنا مختلفين
لا انت تشبهني
و لا اني اشبهك
استودعكم الله
تصبحون على خير
د. سيف سمير البياتي اخصائي طب الاطفال
