-صباح الخير دكتور
اليوم جابت ام الطفل و نريد حليب صناعي زين حضرتك تكتبه !
– ليش شعجب يعني امه موجوده و تكدر ترضعه عادي
– مو دكتور ما نزل حليب بس لما ينزل الحليب
– لا لا لحظه نفهم الحليب موجود و دا ينزل و اسمه هذا الصمغه و لونه اصفر صح؟
– اي صح
– هذا كميته بالرضعه الوحده هي 5 سيسي
– صدك جذب 5 سيسي ! يعني اقل من ربع الرقم
– اي لان معدته بكد الكرزه باول يوم و لان هذا الحليب مشبع و غني بالبروتين
– شكلنا فاهمين السالفه خطا
– فعلا و هو هذا اللي يصير دا تنطون حليب بكميات كبيره اول ايام و بعدين يصير عنده مغص بسبب توسع المعدة و كثر الرضاعه و تكولون اوووو هذا بس يبجي من المغص
– بس دكتور هو بس يبجي يعني اكيد جوعان !
– هذا اللي لازم نفهمه دائما انه الطفل يبجي من البرد من الحر من الاضاءه موسخ نفسه
يريدك
يريد امه
ضايج
محتصر لان انولد بالعراق
و اهم من كلهن تورط و اجه بشهر العاشر اللي لا هو حار و لا هو بارد و الحبوبات مغطياته بالف غطا و يكولن بارده و هن نايمات على السبلت
يلا ما علينا
خلي تكمل رضاعه طبيعيه
قبل المميات شون كانوا عايشين الاطفال
– صدك هو هذا الحليب اللي اسمه الصمغه مفيد ؟
هو بس لونه الاصفر يكولك انه هو مفيد
هو اول لقاح لطفلك
هو مليان اجسام مضاده و مناعيه
هو يحميه من الالتهابات اللي تصير باول شهر
تدرين شيسموه بره ؟
يسموه السائل الذهبي و لهذا هو مهم و اهم من كل مهم
– اخر سؤال ليش تدعم هلكد الحليب الطبيعي خو اكتبلي اي حليب و اخلص مني ؟
– لان اني اريد الافضل لطفلك
لان هو هذا الطب
و الطب وقايه
و الحليب الطبيعي اساس كل وقايه
و للي يرضعون طبيعي استمري انت ترضعين ذهبا
و للي ما حبوا يكملون بمشوار الرضاعه الطبيعيه حياتك خيارتك ما اتدخل بيها
د. سيف سمير البياتي اخصائي طب الاطفال
