صباح الخير
هوايه امهات يتسألون :ابني عمره ست اشهر مطالعتله اسنان ليهسة.. ابني عمره ٨ اشهر مطالعتله اسنان ليهسة ..ابني عمره ١١ شهر مطالعتله اسنان ليهسة
وهكذا
حبيت اوضح نقطة مهمة حتى لا يتكرر هذا السؤال دائما
هو مو قانون و لا فرض انه ابنچ او بنتچ من يقبط ستة اشهر تكعدين الصبح تلكيه مسنن
وحتى تسلسل الاسنان بالظهور ممكن يختلف
اكو شي اسمه معدل
واكو اختلافات من طفل لآخر قد تسبق او تتأخر عن هذا المعدل
يعني اللي يسنن بعمر السنه مو معناها هذا مو طبيعي او بي شي
شوكت تبدين تخافين او تتسائلين ابنچ ليش تأخر و شوكت تبدين تقلقين و شوكت تبدين تراجعين بي؟؟!
من يعبر السنه و نص و هو ما مسنن
مثلا بأمريكا ينطون مجال لعمر السنه ونص يلة يدورون اسباب تأخر التسنين
هنا اطباء اسنان همين ينطوه للسنه و نص
طيب
هسة ابنچ صار سنه و نص و بعده ما مسنن شنو راح تسوين ؟!
اول شي تراجعين طبيب اطفال تچيكين مستوى فيتامين دي و الكالسيوم خاف عنده نقص حتى ينطوه تعويض و تچيكين خاف عنده قصور بوظائف الغدة الدرقيه
طلع طبيعي
تجين تراجعين طبيب الاسنان يفحص اللثه موضعياً خاف بيها تليف او تثخن و ياخذله اشعة للتأكد من وجود الاسنان و معرفة سبب تأخر بزوغها
في هاي الاثناء و قبلها كل ما عليج ان تسويه كأم هو الاهتمام بتغذية طفلچ تغذية صحية و تعريضه لأشعه الشمس لأكتساب فيتامين دي او اخذ فيتامين دي بوصفه طبيب
وكذلك اهتمي بنظافة الفم و تنظيف بقطعة شاش نظيفه و عمل مساج للثة بأصبعچ ويكون نظيف و تدعكين اللثه بلطف ذهاباًو اياباً
اتمنى تكون الفكرة واضحة
تحياتي للجميع اتمنالكم نهار سعيد
اللي بالصوره هو التقريبي بالشهر
#_أسنان
د. سيف سمير البياتي اخصائي طب الاطفال
