طعام الاطفال
ابنك كمل ١٢٠ يوم
او بنتك كملت ١٨٠ يوم
و بين الاثنين نختار شوكت نبدي نوكل الطفل
قسم يكولون ٤ اشهر و قسم يكولون ٦ اشهر
و اهم من كلهن هي علامات الاستعداد للطعام
اللي هن من اهمهم مضاعفه وزن الولاده
و بدا باسناد رقبته
و ما يرفض الملعقه
و عنده استمتاع بمنظر الطعام و رغبه بالمشاركه
ناخذ كم تفصيل صغير :
❤ اي وقت نبدي بيه من اليوم؟
الظهيرة وقت الغداء حتى اذا صار مغص عادي نلحكله و بعد الغداء نبدي بالفطور و اخر شي وقت العشاء
❤ الكميه شكد؟
ملعقه صغيره او اثنين و كل يومين نزيد ملعقه و اعتبريها وجبه لما طفلك يشبع و يرفض المزيد
لا للضغط على الطفل
💖 شكد الكميه المتوقعه انه يشبعه؟
ماكو حجم معين كل طفل و قدرته بس بصوره عامه حجم المعده بكد حجم يده مقبوضه
💖 سماكه الوجبه؟
مثل الحليب اول وجبات
و نبدي نزيد تخن القوام سريعا
❤ و شنو رايك بطعام الاصابع انه الطفل يوكل نفسه بنفسه؟
احسن نظام
و افضل نظام
بس ما ممكن قبل ٦ اشهر يعني ١٨٠ يوم
و لازم بعدها
❤ الخطوه الثانيه من طعام الاصابع شنو هي؟
بعمر ٩ اشهر الاكل يقطع الى مكعبات و الطفل يستخدم ابهامه و ياكل
❤ بعمر السنه شنو ياكل ؟
بعمر السنه او حتى قبلها بحوالي ال ١٠ اشهر الى سنه اكل بيت عادي
❤ شنو رايك بالشاي للطفل؟
الشاي ما يعطى اقل من عمر ٥ سنوات
الشاي يمنع امتصاص الحديد
❤ و شنو رايك باللحم للطفل ؟
مع و بشده و يمكن وضعه مع اول وجبات
❤ اريد انطي لابني جوز لان مفيد؟
شكرا ما نريد اي خطر يسبب الاختناق لطفلك
❤ شنو ممنوع تحت عمر سنه ؟
العسل
السكر
الملح
العصير الطبيعي و الصناعي
❤ و شنو اخبار الرضاعه؟
راح نبدي نقلل ويه دخول الاكل
اذكرك من دخلتي اول اكله معناها انت بديتي بالفطام
كل شهر تنرفع رضعه
بحيث بعمر السنه رضعتين او ٣ رضعات
❤ الكوب شوكت يدخل؟
بالعاده بعمر ٩ اشهر الكثير من الامهات يعلمن اطفالهن على الشرب من الكوب
بعمر ٦ اشهر قسم منهم بدوا
بعمر سنه اشجعك جدا انه وداعا للمميه و انطي الحليب بالكوب
❤ ممكن استخدم حليب الام او حليب الرضع للطبخ؟
اي عادي شنو المشكله
❤ تغييرات متوقعه ؟
تغييرات بالخروج و على الاغلب امساك
❤ من بديت اوكل طفلي بدا الخروج يصير بيه مخاط اطو مشكله؟
اي معناها انت مستعجله
❤ ممكن جداول للاكل ؟
ماكو ما عاد اكو جداول
بس بصوره عامه
الخضراوات تليها الفواكه
الحبوب هي الرز ثم الشوفان و اخر شي الحنطه
اللحوم نبدا بالدجاج و ثم لحم الغنم ثم البقري ثم السمك
اللبن من عمر ٦ اشهر
الحنطه بعد ٦ اشهر
الجبن و السمك ٨ اشهر
البيض ٦ اشهر
❤ البيض ٦ اشهر ؟! بس اني انطيت بيض بعمر ٤ اشهر خوما اكو مشكله؟
لا ابدا
دام مشت الامور عادي هاهيه استمري
❤ ليش تنشر هوايه عن اكل الاطفال؟
فقر الدم بالعراق بسبب النظريه الخاطئه انه الحليب زين هي السبب
❤ احسن حليب بعد عمر السنه؟
حليب الام
❤ احسن حليب قبل عمر السنه ؟
حليب الام
كلهم يدعون القرب من حليب الام بس و لا واحد منهم بيه خلايا دفاعيه مناعيه حيه و لا واحد منهم يتغير ويه حاجه طفلك
❤ توصيات اخرى؟
الحليب بعد عمر السنه مرتين فقط باليوم
د. سيف سمير البياتي اخصائي طب الاطفال
