#طواريء
اليوم حاب احجيلكم عن موضوع المواضيع
الموضوع اللي هو سبب الشد و الجذب بين الأهل و بين بعض الأمهات و الآباء من جهه و أطباء الأطفال من جهه اخرى
الموضوع هو موضوع سحب مي الظهر
مي الظهر هو سائل موجود بالدماغ و يحيط بيه و يحيط بالحبل الشوكي
تخيلوه مثل كيس بلاستيك (الاغشيه السحائيه) بيه و متروس مي ( مي الظهر) و بنصه طوبه ( الطوبه هي الدماغ و الحبل الشوكي )
في أحيان تلتهب هذه الاغشيه و بالتالي تعبر البكتريا و يصير التهاب بهذا السائل و الغشاء
و طبعا التهاب الاغشيه السحائيه هذا راح يؤدي إلى أعراض مختلفه منها الحراره و الاختلاجات و غيرها و غيرها
اللي هو مو موضوعنا و اكيد التشخيص يتم من قبل الطبيب المعالج
.
الطريقه حتى نعرف انه الطفل مصاب بالتهاب السحايا هو عن طريق سحب ١ سيسي من هذا المي و نحلله و نشوف خلايا الالتهاب
.
.
.
الخرافات الملتصقه بهذا الموضوع انه السحب هذا السيسي راح ياذي الطفل و يسكطه
السحب يتم بفراغ تحت الحبل الشوكي فشون اصلا راح ياذي (الصوره )
شويه اشرحلكم عليها
باللون الأصفر هو الحبل الشوكي و نهايته
و اللي باللون الاحمر هو المي اللي راح نسحبه
يعني مثل ما تشوفون ابره السحب بعيده بعيده بعيده
هوايه من الزملاء الاطباء و اني منهم من كانوا اطفال مسوين هذا السحب
و اللي اسكطوا اسكطوا بسبب التهاب السحايا مو بسبب السحب
.
.
خرافه أخرى انه هذا المي ما يتعوض
و الصحيح انه هذا المي يتبدل ٥ مرات باليوم
بقدره رب العالمين
و انه اكو ٣٠٠ سيسي موجوده عدنا
.
.
مخلص الكلام
ماكو بالدنيا إجراء طبي الا لمصلحه المريض
تمنياتي لكم بالصحه و السلامه
و اتمنى نشر هذا البوست حتى يطمئن كل اب و كل ام من سلامه هذا الإجراء
د. سيف سمير البياتي
اخصائي طب الأطفال
