#عادات_خاطئه
بيوم من الايام كنت اداوم بوحده الخدج (العنايه المركزه لحديثي الولاده).
يعني اول من يولد الطفل، طبيب الاطفال يسويله فحص وانعاش وهالامور الي ماريد ادوخكم بيها بعدها يدخل الطفل للخدج لمده ساعه او ساعتين حسب حالة الطفل الصحيه بعدها يا يبقى بالعنايه لو ننطي الاهله..
فجابولي طفله بقيتها يمي ساعتين فحصتها فحص شامل سويت كل الاجراءات المطلوبه وبدينا وياها رضاعه والامور كانت ممتاز..
اجت عمة الطفله كتلها الف مبروك وتتربى بعزكم ومن هالسوالف وكباقي الاطفال قبل لا اخرجهم انطي للاهل هاي التعليمات
*حليب الام هو الحليب الاساسي
*لتنطوا غير حليب امه
*اذا لاحظتوا اي ضيق بالتنفس، انين بصدره، خمول، قله بالرضاعه رجعوليا افحصه
والله العمه اخذت الطفله وراحت… ورى تقريبا نص ساعه جوني الاهل يركضون دكتور بنتنا ماتت…. بنتنا ماتت!!
ركضت عليهم اباوع الطفله زركه نيلي ولانفس ولانبض.. اني يالله شصار هسه انطيتا الكم مابيها اي شي!! وكلتوها شي… لا دكتور كلشي ماسوينا…!
اني راسا بديت وياها انعاش قلبي رئوي واني ويه عقلي داكول لو مختنكه بالحليب لو موكليها شي.. اني وداسويلها الانعاش جان يكمز شي اسود من حلك الطفله!!!!
اباوع الكى تمر….!!!!
من ذبت التمره من حلكها بدى نفسها يرجع شوي شوي ورجعت دقات قلبها بقيتها عالاوكسجين بعد ماتاكدت كل الامور تمام
نداريت عالاهل منو موكلها تمر؟؟ عمتها كالت دكتور اني هاي عاداتنا الطفل اول من ينولد نخلي بحلكه تمر!! كتلها حجيه صدك تحجين! شون تخلين تمرة كاملة بفمها متكوليلي!!
كالت عاداتنا بعد… كتلها هالشي ابد مو صحيح ولوما لطف الله جان الطفله راحت..
فنصيحه لله تره هاي العادات والتقاليد ممكن تقتل الطفل ولتسمعون كلام اي شخص يفتيلكم بشغلات بصحة اولادكم .. خليج على تواصل مباشر مع طبيب الاطفال واخذي المعلومات حصرا من عنده
ادري طولتها عليكم بس هالموضوع كلش مهم والطفل امانة بايدينا
تحياتي الكم
منقول عن د.مصطفى
طبيب اطفال/دراسات عليا
ملاحظه: الطفله بصحة ممتازه وتم اخراجها من المستشفى❤️
from د. سيف سمير البياتي