عيدكم سعيد و عمركم مديد
و اكيد نستغل عيد الاضحى و نسولف بيه عن اللحم للاطفال
اللحم وحده من الخيارات الأولى لطعام الاطفال
قسم يكولون هي اول طعام يقدم للطفل بعمر ٤ إلى ٦ أشهر
لسه اتذكر من نبدي نوكل الاطفال شون تكون الوجبه الثانيه من بعد شوربه الرز ( مو فوح الرز ) هو رز و لحم محضر و مطبوخ و مقطع بالخلاط و قوامه كريمي خفيف
نجي للتجارب العمليه على أرض الواقع
بوحده من التجارب العلميه
جابوا 544 طفل
كلهم بعمر ٧ سنوات
قسم منهم انطوهم 60 غرام لحم كوجبه اضافيه
و قسم انطوهم كوب حليب كوجبه اضافيه
و قسم انطوهم نفس الطاقه بس بشكل زيت نباتي كوجبه اضافيه
و قسم كلشي ما انطوهم
بعد سنتين لكوا
انه اللي أخذوا الوجبات الاضافيه وزنهم أعلى بمعدل 400 غرام عن اللي ما أخذوا اي شي
حجم العضلات بالمجموعه اللي أخذوا اللحم كان اكو زياده بنسبه 80 بالميه
مقارنه مع اللي أخذوا الحليب اللي زيادتهم 40 بالميه
الاطفال اللي أخذوا اللحم كانوا أعلى باختبار الذكاء و الرياضيات
أتصور السبب بالتقدم الذهني يعود لان اللحم بيه حديد و الحديد يؤثر على فقر الدم و فقر الدم يؤدي الى صعوبه و تأخر بالذكاء
لذلك خلوا اللحم من اول وجبات اطفالكم
و احرصوا عليها
و اذا انتوا نباتيين مو شرط الطفل يطلع نباتي عليكم بس جربوا وياه اللحم و راح يحبه
د. سيف سمير البياتي اخصائي طب الاطفال
رابط الدراسه بالتعليقات
from د. سيف سمير البياتي