كم كلمه للاباء و الامهات هنا بالصفحه بالاخص للامهات طبعا
الامهات العجولات بكل شيء
اللي كلشي يردون الان و كيف ما يردون
الموضوع يشمل كل شيء و اي شي
الاكل مثلا
كانت بنتي الكبيره انتقائيه
عانينا وياها في كل شيء
صعبه التقبل لانواع و اصناف الطعام المختلفه
فعلا ما كنت بمستوى الوعي اللي بيه الان و كانت اكو الكثير من الاخطاء بتغذيتها
بس صبرنا و صبرنا
و الان هي حرفيا اغلب الاكل اللي ما تحبه الان تحبه و تفضله عدا البيض و الجبن و اللبن و مخليها على راحه راحتها
بنتي الثانيه عمرها ٨ سنوات عدها حب مو طبيعي للملابس و تحب الملابس هي تختارها رغم اختلافنا في تقبل ذوقها
و دا نحاول نتقبل ذوقها و اصرارها على لبس نفس الثوب ٣٠٠ مره بالشهر و ما كاعد تنجح الخطط
اني مو بس مليت من نقاشهم هي و امها على هذا الموضوع
لا اني كرهت الموضوع اصلا
و المشكله بنهايه كل مره تفوز و تلبس اللي تحبه للمره المليون بعد المئه
مراجعيني اللي صارلي سنين اعرفهم مثل اولادي هم نفس اولادي كاعد تتغير صفاتهم و طبعهم و اكلهم نحو الاحسن و الاهدا
اللي اريد اوصله هنا :
❤ الصبر مفتاح لكل فرج فالطفل يتغير و يتغير كثيرا
❤ لو اني بعقل بعض الاباء و اقارن طفلي مع كل طفل بالدنيا اكيد ما راح انام من القهر و الغيره
❤ اني لو ضخمت كل تصرف و كل حركه و كل نفس يتصرفه طفلي كان نفسيتي بالحضيض
❤ اريدكم تؤمنون بالفروق الفرديه بين طفل و اخر
اريدكم تفهمون ان الطفل مو نسخه الاخر
❤ اني لو اظل اركض وره جهالي بالماعون و اضرب او اعيط على بنتي حتى تقبل تلبس فلان ملبس راح اكون ضفت كائن اخر ضعيف بلا شخصيه و لا ثقه بالنفس
❤ كل شيء راح يتم مثل ما تردون بس اصروا على التغيير
❤ كل شي راح يتعلمون بس ننتظر و ننتظر و نحرص على ان يكونون شخصيات مستقله غير تابعه لنا بالتفكير تعرف تقرر و تاخذ قرار بالدراسه و الحياه و كل شيء
اتمنى وصلت الرساله
مع الحب
د. سيف سمير البياتي اخصائي طب الاطفال
from د. سيف سمير البياتي